‘आई-बाबा प्लिज मतदान करा’; विद्यार्थ्यांचे पत्राद्वारे आवाहन
दैनिक स्थैर्य | दि. २५ ऑक्टोबर २०२४ | फलटण |
भारताची लोकशाही जगात प्रसिद्ध आहे. ही लोकशाही जास्तीत जास्त प्रगल्भ होण्यासाठी ‘आई-बाबा प्लीज तुम्ही आवश्यक मतदान करा’, असे आवाहन चिमुकल्या विद्यार्थ्यांनी स्वतः पत्र लिहून आपल्या पालकांना केले आहे.
मतदान जनजागृती कार्यक्रम प्राथमिक शाळा जिल्हा परिषद गिरवी, तालुका फलटण येथे घेण्यात आला. यावेळी विद्यार्थ्यांनी आनंदाने अत्यंत उत्सुकतेने पत्र लिहिले.
या पत्रात लिहिले आहे की, भारताची लोकशाही जगात लोकप्रिय आहे. ही लोकशाही अधिक प्रगल्भ होणे गरजेचे आहे. त्यासाठी मतदान करणे गरजेचे आहे. त्यामुळे मी तुम्हाला एक जबाबदार भावी नागरिक या नात्याने मतदान करावे, अशी नम्र विनंती पत्राद्वारे केली आहे.
या उपक्रमामुळे विद्यार्थ्यांना मतदान व लोकशाहीचा अर्थ समजला. पत्रलेखनाचा उपक्रम त्यांनी प्रथमच अनुभवला. प्रत्यक्ष पोस्ट कार्डवर पत्र लिहिणे हे त्यांच्यासाठी नवीन होते. त्यामुळे सर्व विद्यार्थी वर्ग उत्साहात होता. विधानसभा सार्वत्रिक निवडणूक २०२४ अनुषंगाने २५५ फलटण (अ.जा) विधानसभा मतदारसंघांमध्ये मतदार जनजागृतीबाबत विविध उपक्रम राबविण्यात येत आहेत. तसेच विविध पातळीमध्ये विविध घटकांमध्ये मतदान जनजागृतीला महत्त्व देण्यात येत आहे.
सदरचा उपक्रम नोडल अधिकारी स्वीप सचिन जाधव व स्वीप टीम यांच्या मार्गदर्शनखाली घेण्यात आला.
