पंढरीचे वारकरी ते अधिकारी मोक्षाचे : ह भ प विशाल महाराज खोले

अध्याय आठवा  : ब्रम्हाक्षरनिर्देशयोग 

स्थैर्य, श्री क्षेत्र आळंदी दि . 20 : ज्याप्रमाणे नद्या , नाले , ओढे सागराला जावून मिळतात व सागररुप होतात . तद्वत महाराष्ट्राच्या दऱ्याखोऱ्यातून निघालेला विठ्ठल भक्तीचा प्रवाह हा भक्तिचा सागर असलेल्या भूवैकुंठ  श्री क्षेत्र पंढरीत चंद्रभागेत विलीन होतो . जो विठ्ठल भक्तीत  विलीन झाला त्याला पुन्हा जन्ममरणाची भिती नाही . ” पंढरीचे वारकरी ते अधिकारी मोक्षाचे ”  हे संत वचन आहे आणि हेच आठव्या अध्यायाचे सार आहे असे मत ह भ प विशाल महाराज खोले यांनी व्यक्त केले.

आषाढी वारीनिमित्त श्री संत ज्ञानेश्वर महाराज संस्थान कमिटी , श्री क्षेत्र आळंदी , महाराष्ट्र राज्य पालखी सोहळा पत्रकार संघ व माय एफएम इंडिया रेडिओ यांच्या संयुक्त विद्यमाने ” पालखी सोहळा पत्रकार संघ ” या फेसबुक पेजवर दररोज सायंकाळी ४ वाजता ग्रंथराज श्री ज्ञानेश्वरी ग्रंथ निरुपण या कार्यक्रमाचे आयोजन करण्यात आले आहे . आज ( शनिवार ) आठव्या  दिवशी कु-हा – मुक्ताईनगर ( जि जळगाव  ) येथील ह भ प विशाल  महाराज खोले  यांनी ब्रम्हाक्षरनिर्देशयोग  या आठव्या  अध्यायावर निरुपण केले .

म्हणोनि तूप होऊनी माघौतें l

जेवीं दूधपणा न येचि निरुतें l

तेवि पावोनियां जयातेंl

पुनरावृत्ती नाहीं ll

ह भ प खोले महाराज  या अध्यायाचे निरुपण करताना म्हणाले ,  माउलींनी या अध्यायात  ब्रम्हाक्षरनिर्देशयोग विस्तृतपणे  सांगितला आहे . माऊली  सांगतात  ज्याचे आकारावाचून अस्तित्व आहे . ज्याला जन्मही नाही आणि अंतही नाही . जे सर्वस्वरुप आहे . जे आकाशापेक्षा पुरातन व परमाणूपेक्षा लहान आहे असा परमात्मा म्हणजे श्री विठ्ठल आहे . जो सुक्ष्म  व्यापक आणि जगात असुन नष्ट होत नाही त्याला ब्रम्ह म्हणतात.

जो देहाच्या उत्पत्ती नाशा मुळे उत्पन्न किवा नष्ट होत नाही असा देह्स्थ कूटस्त आत्मा अध्यात्म आहे. असंग अव्यक्त ब्रम्हाचे ठिकाणी जगदाकार उत्पन्न होणारा जो व्यापार त्यालाच कर्म म्हणतात.  उत्पत्ती विनाश वाण भौतिक शरीर अधिभूत आहे.  जो देहात कर्ता , भोक्ता , दृष्टा या स्वरुपात आहे जो वस्तुतः परमात्मच पण अहंकाराने कार्य कारण उपाधिमुळे तोच जीव अधिदैव आहे . देहभावाचा  नाश करणारा जो साधन प्रयोग आहे त्याला अधियज्ञ म्हणतात . मरणकाळी कोणता मार्ग प्राप्त होईल हे माणसाच्या स्वाधीन नसल्याने हे सर्व अनिश्चित आहे .  परंतु जो माझे नामस्मरण करतो , माझी सेवा करतो . जे अखंडपणे अंत:करणपूर्वक माझ्याशी एकरुप झाले आहेत . त्या भक्तांच्या मरणकाळी मी त्याचा सेवक होतो . देह जावो अथवा राहो पांडुरंगी दृढ भावो अशी ज्याची स्थिती झाली आहे तोच केवळ ब्रम्हरुप स्थानाला प्राप्त होतो . या कार्यक्रमाचे निवेदन ह भ प स्वामीराज भिसे यांनी केले .

आज रविवार  दि . २१  रोजी आळंदी (जि. पुणे) येथील ह भ प लक्ष्मण महाराज शास्त्री  हे  सायंकाळी ४ वाजता ” पालखी सोहळा पत्रकार संघ ” या फेसबुक पेजवर श्री ज्ञानेश्वरीच्या राजविद्याराजगृह्ययोग या नवव्या अध्यायावर निरुपण करतील .

दरम्यान आज ( शनिवार ) श्री क्षेत्र आळंदी येथे आजोळघरी श्री ज्ञानेश्वर माऊलींच्या पादुकांची विधीवत पूजा, अभिषेक व आरती पालखी सोहळा प्रमुख योगेश देसाई यांचे हस्ते करण्यात आली. या पुजेचे पौरोहित्य यज्ञेश्वर जोशी व राहूल जोशी यांनी केले. माउलींसमोर गुरुजीबुवा राशिनकर यांच्या  वतीने कीर्तनाची तर डांगे, फरताळे व फाळके यांच्या वतीने जागराची सेवा करण्यात आली.