प्रतिकूल परिस्थितीवर मात करत रोहन कोल्हे यांची ‘कंपनी सेक्रेटरी’ पदाला गवसणी

स्थैर्य, फलटण, दि. २६ ऑगस्ट : अत्यंत प्रतिकूल परिस्थितीवर मात करत, येथील चि. रोहन अंकुशराव कोल्हे यांनी कंपनी सेक्रेटरी (C.S.) या प्रतिष्ठित आणि आव्हानात्मक अभ्यासक्रमात उज्ज्वल यश संपादन केले आहे. त्यांच्या या यशामुळे कोल्हे परिवारासह त्यांच्या गावाचे नाव उज्ज्वल झाले असून, त्यांचे सर्व स्तरांतून मनःपूर्वक अभिनंदन होत आहे.

उच्च शिक्षणासाठी पारंपरिक मार्गाऐवजी वेगळी वाट निवडत, रोहन यांनी कंपनी सेक्रेटरी होण्याचा निश्चय केला होता. विद्येचे माहेरघर असलेल्या पुणे शहरात त्यांनी अहोरात्र मेहनत, जिद्द आणि चिकाटीच्या जोरावर हा अवघड अभ्यासक्रम पूर्ण केला. आपल्या आई-वडिलांच्या कष्टाचे सोने करण्याच्या ध्येयाने प्रेरित होऊन त्यांनी हे यश मिळवले आहे.

त्यांचे हे यश येणाऱ्या नवीन पिढीसाठी अत्यंत प्रेरणादायी आणि दिशादर्शक ठरले आहे. एका सामान्य कुटुंबातील तरुणाने मिळवलेल्या या चमकदार यशाबद्दल समस्त कोल्हे परिवार, नातेवाईक आणि मित्रमंडळींकडून त्यांच्यावर कौतुकाचा वर्षाव होत आहे.