अक्कलकोट येथे श्री स्वामी समर्थ अन्नछत्र मंडळाकडून ‘ऑनलाईन महाप्रसाद बुकिंग सेवा’
अक्कलकोट (जि. सोलापूर) हे श्री स्वामी समर्थ महाराजांचे पवित्र स्थान आहे. श्री स्वामी समर्थ महाराजांना भगवान दत्तात्रेयांचा अवतार मानले जाते. स्वामी भक्तांकडून येथे स्वामी समर्थांच्या समाधीचे पूजन केले जाते. श्री स्वामी समर्थांचे कृपेने भक्तांची सर्व दु:खे दूर होतात, असे मानले जाते. याचा अनुभव अनेक भक्तांना आल्याने या पवित्र स्थानी दिवसेंदिवस भक्तांची गर्दी वाढत आहे. त्यामुळे अनेक भक्तांना वेळेअभावी रांगेतून महाप्रसाद घेणे शक्य होत नाही. हे लक्षात घेऊन येथे भक्तांच्या सेवेसाठी असलेल्या श्री स्वामी समर्थ अन्नछत्र मंडळाकडून ऑनलाईन महाप्रसाद बुकिंग सेवा सुरू करण्यात आली आहे.
या अन्नछत्र मंडळाचे संस्थापक अध्यक्ष जन्मेजयराजे विजयसिंहराजे भोसले यांनी स्वामीभक्तांची अडचण लक्षात घेऊन महाप्रसादास येणार्‍या सर्व भक्तांसाठी मोफत ऑनलाईन महाप्रसाद बुकिंगची व्यवस्था केली आहे.
महाप्रसाद बुकिंग करण्यासाठी भक्तांनी www.swamiannacchatra.org या वेबसाईटवर जाऊन तिथे असलेल्या ऑनलाईन महाप्रसाद बुकिंग या बटनला क्लिक करावे. त्यानंतर पुढील ३ महिन्यांसाठीच्या तारखेस / तिथीचे विवरण दिसेल. कॅलेंडरवरील आपल्याला ज्या तारखेस / तिथीस महाप्रसाद घ्यायचे आहे. त्या तारखेवर क्लिक करावे. फॉर्म भरावा आणि सबमिट करावे. सबमिट केल्यावर आपणास ईमेलवर एक बुकिंग कन्फर्मेशन मिळेल. ते डाऊनलोड करावे आणि प्रवेशावेळी प्रवेशव्दारावर दाखवावे.
ऑनलाईन महाप्रसाद बुकिंग करण्यासाठी आपला फोटो व मोबाईल क्रमांक आवश्यक आहे. तसेच एका वेळेस जास्तीत जास्त ५ जणांसाठी ऑनलाईन महाप्रसाद बुकिंग करता येईल.
हा ऑनलाईन महाप्रसाद दुपारी १२:३० ते ४:०० आणि रात्री ८:३० ते १०:०० यावेळेत निर्धारित करण्यात आला आहे. त्यानंतर रांगेतून महाप्रसाद घ्यावा लागेल, असेही अन्नछत्र मंडळाकडून स्वामीभक्तांना आवाहन करण्यात आले आहे.
