मुधोजी महाविद्यालयात अभिरूप संसदेत ‘लोकशाहीची रंगत’; अजितदादांना भावपूर्ण आदरांजली
फलटणच्या मुधोजी महाविद्यालयात अभिरूप संसद उपक्रम उत्साहात. प्रारंभी अजितदादा पवारांना श्रद्धांजली; विद्यार्थ्यांची खडाजंगी चर्चा, लोकशाहीचा प्रत्यक्ष अनुभव.
स्थैर्य, फलटण, दि. १५ फेब्रुवारी : फलटण येथील मुधोजी महाविद्यालय येथे अंतर्गत गुणवत्ता हमी कक्ष (IQAC), राज्यशास्त्र विभाग, निवडणूक साक्षरता क्लब व संवैधानिक मित्र यांच्या संयुक्त विद्यमाने अभिरूप संसद (Mock Parliament) हा उपक्रम उत्साहात पार पडला. लोकशाही मूल्यांची जाणीव करून देणारा हा कार्यक्रम विद्यार्थ्यांसाठी संसदीय कार्यपद्धतीचा थेट अनुभव ठरला.
कार्यक्रमाच्या प्रारंभी महाराष्ट्राचे तत्कालीन उपमुख्यमंत्री मा. अजितदादा पवार यांना भावपूर्ण आदरांजली अर्पण करण्यात आली. सभागृहात शोकप्रस्ताव मांडण्यात आला असून सर्व सदस्यांनी उभे राहून दोन मिनिटे मौन पाळले. त्यांच्या सार्वजनिक कार्य, प्रशासनिक नेतृत्व व राज्याच्या विकासातील योगदानाचा विशेष उल्लेख करण्यात आला. त्यानंतर सभापतींच्या परवानगीने संसदेचे कामकाज सुरू झाले.
या अभिरूप संसदेतील एकूण ३४ विद्यार्थ्यांनी सहभाग घेतला. सत्ताधारी व विरोधी पक्ष असे दोन गट तयार करण्यात आले. सत्ताधारी पक्षात १७ मंत्रीपदे देण्यात आली तर विरोधी पक्षात ११ सदस्य सहभागी झाले.
सभापती म्हणून वेदांत मोरे यांनी जबाबदारी सांभाळली. पंतप्रधानपदी मयुरी फडतरे तर विरोधी पक्षनेतेपदी जय जाधव यांची निवड करण्यात आली.
प्रधानमंत्री, गृहमंत्री, अर्थमंत्री, संरक्षणमंत्री, रेल्वेमंत्री, ग्रामीण विकास मंत्री, पेट्रोलियम व नैसर्गिक वायू मंत्री, क्रीडामंत्री, कृषिमंत्री, महिला व बालविकास मंत्री, आरोग्यमंत्री तसेच परराष्ट्र, रस्ते व वाहतूक, वाणिज्य व उद्योग, ऊर्जा व जलशक्ती मंत्री अशी विविध मंत्रीपदे वाटप करून संसदीय पद्धतीनुसार कामकाज राबविण्यात आले.
संसदेत देशाची सुरक्षा, महिला सुरक्षा, बेरोजगारी, महागाई, अंतर्गत राष्ट्रीय प्रश्न तसेच महिला व बाल सुरक्षा विधेयक यांसारख्या विषयांवर सत्ताधारी व विरोधी पक्षात खडाजंगी चर्चा झाली. प्रश्नोत्तर तास, पूरक प्रश्न, आरोप-प्रत्यारोप व विधेयक मांडणीमुळे प्रत्यक्ष लोकशाही प्रक्रियेचा अनुभव विद्यार्थ्यांना मिळाला.
विद्यार्थ्यांनी मुद्देसूद मांडणी, तार्किक प्रतिवाद व प्रभावी वकृत्व कौशल्याचे सादरीकरण करत उपस्थितांची दाद मिळवली. नेतृत्वगुण विकसित करणे, संविधानिक मूल्यांची जाणीव निर्माण करणे व जागरूक नागरिक घडविणे हा या उपक्रमाचा मुख्य उद्देश होता.
कार्यक्रमाचे उद्घाटन प्राचार्य प्रा. डॉ. पी. एच. कदम यांच्या हस्ते झाले. यावेळी IQAC समन्वयक प्रा. डॉ. टी. पी. शिंदे, कला शाखा प्रमुख डॉ. ए. एन. शिंदे, विविध विभागप्रमुख, प्राध्यापक व शिक्षकेतर कर्मचारी उपस्थित होते.
हा कार्यक्रम प्रा. गिरीष पवार यांच्या नेतृत्वाखाली व प्रा. प्रियांका शिंदे यांच्या समन्वयातून यशस्वीरीत्या पार पडला. कार्यक्रमास विद्यार्थ्यांचा उत्स्फूर्त प्रतिसाद लाभला.
फलटणमध्ये आयोजित या अभिरूप संसदेने लोकशाहीची जाणीव, विचारमंथन आणि नेतृत्वगुणांचा संगम साधत विद्यार्थ्यांसाठी संसदीय कार्यपद्धतीचे सशक्त व्यासपीठ उपलब्ध करून दिले.
