निंभोरे (ता. फलटण) येथून मध्यरात्री १६ वर्षीय अल्पवयीन विद्यार्थिनीचे अपहरण; अज्ञात व्यक्तीविरुद्ध गुन्हा दाखल

निंभोरे (ता. फलटण) येथून मध्यरात्रीच्या सुमारास घरात झोपलेल्या एका १६ वर्षीय अल्पवयीन मुलीचे अज्ञात व्यक्तीने फूस लावून अपहरण केल्याची धक्कादायक घटना उघडकीस आली आहे. याप्रकरणी फलटण ग्रामीण पोलीस ठाण्यात गुन्हा दाखल करण्यात आला आहे.

स्थैर्य, फलटण, दि. 25 मार्च : फलटण तालुक्यातील निंभोरे येथून एका १६ वर्षीय अल्पवयीन शाळकरी मुलीचे मध्यरात्रीच्या सुमारास फूस लावून अपहरण करण्यात आल्याची अत्यंत धक्कादायक आणि चिंताजनक घटना उघडकीस आली आहे. याप्रकरणी मुलीच्या मावशीने दिलेल्या तक्रारीवरून ‘फलटण ग्रामीण पोलीस ठाण्यात’ एका अज्ञात व्यक्तीविरुद्ध अपहरणाचा गुन्हा दाखल करण्यात आला आहे.

पोलिसांनी दिलेल्या माहितीनुसार आणि फिर्यादीनुसार, ५२ वर्षीय फिर्यादी महिला या निंभोरे येथे त्यांच्या कुटुंबासह राहतात. त्यांची १६ वर्षीय भाची फलटण येथील एका विद्यालयात इयत्ता ११ वी (कला शाखा) मध्ये शिक्षण घेत आहे.

दिनांक १९ मार्च रोजी रात्री ११:३० च्या सुमारास घरातील सर्वजण जेवण करून हॉलमध्येच झोपले होते. दरम्यान, मध्यरात्री २:०० वाजेच्या सुमारास फिर्यादी यांना जाग आली असता, शेजारी झोपलेली त्यांची भाची जागेवर नसल्याचे त्यांच्या लक्षात आले. त्यांनी तातडीने घरातील सर्वांना उठवले आणि घराच्या आजूबाजूला तसेच निंभोरे गावात तिचा शोध घेतला.

मुलगी गावात कुठेच न सापडल्याने नातेवाईकांनी वडजल, सुरवडी आणि फलटण शहरात तसेच पाहुण्यांकडेही तिचा शोध घेतला; परंतु ती कुठेही मिळून आली नाही. अखेर, कोणीतरी अज्ञात व्यक्तीने अज्ञात कारणासाठी आपल्या अल्पवयीन भाचीला फूस लावून पळवून नेले असल्याची खात्री पटल्याने फिर्यादी यांनी पोलिसांत धाव घेतली.

अपहृत मुलीचे वर्णन:

• वय: १६ वर्षे ९ महिने

  

• उंची व बांधा: ४ फूट, सडपातळ

• रंग व ठेवण: सावळी, सरळ नाक, काळे डोळे, उंच कपाळ

• अंगावरील कपडे: निळ्या रंगाचा टॉप आणि मेहंदी रंगाचा पायजमा व ओढणी (पंजाबी ड्रेस), पायात सँडल

• भाषा: मराठी आणि हिंदी

दिनांक १९ मार्च रात्री ११:३० ते २० मार्च पहाटे २:०० वाजेच्या दरम्यान ही अपहरणाची घटना घडली आहे. फलटण ग्रामीण पोलीस या अज्ञात अपहरणकर्त्याचा आणि बेपत्ता मुलीचा वेगाने शोध घेत आहेत.