मालोजीराजे कृषी प्रदर्शनाचा ‘लखपती’ टप्पा; १ लाखांहून अधिक शेतकऱ्यांची रेकॉर्डब्रेक उपस्थिती
चौथ्या दिवशीही जनसागर लोटला; श्रीमंत सत्यजितराजे नाईक निंबाळकर यांनी दिली सदिच्छा भेट. महिला बचत गट आणि युवकांचाही उत्स्फूर्त प्रतिसाद.
स्थैर्य, फलटण, दि. २९ डिसेंबर : फलटण एज्युकेशन सोसायटी संचलित श्रीमंत शिवाजीराजे उद्यानविद्या महाविद्यालय व कृषी महाविद्यालय आयोजित ‘श्रीमंत मालोजीराजे कृषी प्रदर्शन २०२५’ ने लोकप्रियतेचे सर्व उच्चांक मोडीत काढले आहेत. प्रदर्शनाच्या चौथ्या दिवसाअखेर तब्बल १ लाख ५ हजार (१,०५,०००) शेतकऱ्यांनी या कृषी महोत्सवाला भेट दिली असून, प्रदर्शनाला ‘रेकॉर्डब्रेक’ प्रतिसाद मिळत आहे.
श्रीमंत सत्यजितराजेंची उपस्थिती
प्रदर्शनाच्या चौथ्या दिवशी सायंकाळी फलटण एज्युकेशन सोसायटीचे गव्हर्निंग कौन्सिल सदस्य श्रीमंत सत्यजितराजे नाईक निंबाळकर यांनी प्रदर्शनाला सदिच्छा भेट दिली. त्यांनी प्रदर्शनातील विविध स्टॉल्सवर जाऊन आधुनिक कृषी तंत्रज्ञान, बियाणे आणि यंत्रसामग्रीची सविस्तर माहिती घेतली. यावेळी कृषी प्रदर्शन आयोजन समितीच्या वतीने श्रीमंत सत्यजितराजे यांचा विशेष सन्मान करण्यात आला.
शेतकरी आणि महिलांचा उदंड प्रतिसाद
केवळ शेतकरीच नव्हे, तर परिसरातील युवक, महिला शेतकरी आणि महिला बचत गटांनीही प्रदर्शनाला मोठ्या संख्येने हजेरी लावली आहे. प्रदर्शनात सहभागी झालेल्या विविध कृषी निविष्ठा (Inputs) कंपन्यांच्या स्टॉल्सवर माहिती घेण्यासाठी शेतकऱ्यांची झुंबड उडत आहे. आधुनिक शेतीची कास धरण्यासाठी उत्सुक असलेल्या बळीराजामुळे प्रदर्शनाचे मैदान फुलून गेले आहे.
आयोजकांचे आवाहन
हे प्रदर्शन शेतकऱ्यांसाठी ज्ञानाचे खुले दालन ठरत आहे. उर्वरित कालावधीतही फलटण आणि परिसरातील जास्तीत जास्त शेतकऱ्यांनी या संधीचा लाभ घ्यावा आणि आधुनिक शेती तंत्रज्ञान समजून घेण्यासाठी प्रदर्शनाला भेट द्यावी, असे आवाहन आयोजकांच्या वतीने करण्यात आले आहे.
