पसरणी घाटात दरड कोसळली
दैनिक स्थैर्य । दि. १० जुलै २०२२ । सातारा । गेली तीन दिवस पाचगणी परिसरात जोरदार वाऱ्यासह धुवाधार पाऊस पडत आहे . त्यामुळे जनजीवन विस्कळीत झाले आहे . संततधार पडणाऱ्या पावसामुळे वाई-पाचगणी मुख्य मार्गावर पसरणी घाटात दरड कोसळली.शनिवारी दुपारी अडीचच्या सुमारास घाटात रस्त्याच्या मध्यभागी मोठी दरड पडल्याने वाहतूक काही काळ विस्कळीत झाली होती.
पाचगणी व परिसरात गेली तीन दिवसांपासून पडत असणाऱ्या संततधार पावसामुळे डॊगर रांगातून लहान मोठे धबधबे वाहू लागले आहेत. अनेक ठिकाणी लहान मोठ्या दरडी कोसळत आहेत त्यातच आज दुपारी पसरणी घाटातील दत्तमंदिरा नजिक दरडीचा मोठा भाग रस्त्यावर आला. त्यामुळे काही वेळ वाहतूक विस्कळीत झाली होती. घाटात दरड कोसळल्या ची माहिती मिळताच सार्वजनिक बांधकाम विभागाचे अधिकारी घाटात दाखल झाले. जेसीबीच्या साह्याने दगडी बाजूला हटवून वाहतूक पूर्ववत केली. पसरणी घाटात दरवर्षी अशा घटना घडत असुनही सार्वजनिक बांधकाम खाते कायमस्वरूपी उपाययोजना करत नसल्याने जनतेतून नाराजी व्यक्त होत आहे.
