पर्यावरणपूरक गणेशोत्सवासाठी कोळकी ग्रामपंचायतीचा आदर्श उपक्रम; मूर्ती आणि निर्माल्य दानाचे आवाहन
गावात कृत्रिम विसर्जन स्थळांची निर्मिती; नागरिकांचाही उत्स्फूर्त प्रतिसाद
स्थैर्य, कोळकी, दि. १ सप्टेंबर : गणेशोत्सवामुळे होणारे जल आणि ध्वनी प्रदूषण रोखण्यासाठी कोळकी ग्रामपंचायतीने ‘पर्यावरणपूरक गणेशोत्सव’ हा एक व्यापक आणि आदर्श उपक्रम हाती घेतला आहे. याअंतर्गत, गावात कृत्रिम विसर्जन स्थळांची निर्मिती करण्यापासून ते मूर्ती आणि निर्माल्य दान स्वीकारण्यापर्यंतच्या विविध उपाययोजना राबवल्या जात असून, याला ग्रामस्थांकडून उत्स्फूर्त प्रतिसाद मिळत आहे.
कोळकी ग्रामपंचायत आणि जिल्हा प्रशासनाने केलेल्या आवाहनानुसार, गावातील १८३० कुटुंबांपैकी ८२० कुटुंबांनी यंदा मातीच्या मूर्तींची स्थापना केली आहे. प्रदूषण टाळण्यासाठी ग्रामपंचायतीने नागरिकांना खालीलप्रमाणे आवाहन केले आहे:
- मूर्ती आणि सजावट: प्लास्टर ऑफ पॅरिसऐवजी शाडू मातीच्या मूर्तींची स्थापना करावी. सजावटीसाठी थर्माकोल आणि प्लास्टिकचा वापर टाळावा.
- ध्वनी प्रदूषण: डीजेऐवजी पारंपरिक वाद्ये किंवा भजनी मंडळांना प्राधान्य द्यावे.
- विसर्जन: मूर्तींचे विसर्जन नदी, तलाव किंवा विहिरीत न करता, ग्रामपंचायतीने उभारलेल्या कृत्रिम तलावात किंवा घरीच टबमध्ये करावे.
- मूर्ती आणि निर्माल्य दान: मूर्ती आणि निर्माल्य ग्रामपंचायतीने नियोजित केलेल्या संकलन केंद्रांवर दान करावेत. दान केलेल्या मूर्ती कुंभार कुटुंबीयांकडे पुनर्वापरासाठी दिल्या जाणार आहेत.
या उपक्रमाच्या अंमलबजावणीसाठी, ग्रामपंचायतीने कोळकी/गिरवी पाणीपुरवठा योजना आणि पत्र्याचा मळा येथे दोन कृत्रिम विसर्जन स्थळे आणि संकलन केंद्रे प्रस्तावित केली आहेत. जनजागृतीसाठी गावात विविध ठिकाणी फलक लावण्यात आले असून, गणेश मंडळे आणि महिला बचत गटांसोबत बैठकाही घेण्यात आल्या आहेत.
कोळकी ग्रामपंचायतीचा हा उपक्रम, सातारा जिल्हाधिकारी श्री. संतोष पाटील यांनी केलेल्या पर्यावरणपूरक गणेशोत्सवाच्या आवाहनाला एक उत्तम प्रतिसाद असून, इतर गावांसाठी एक आदर्श ठरत आहे.
