कोळकीचे उपसरपंच विकास नाळे यांचा राजीनामा
दैनिक स्थैर्य | दि. ३ फेब्रुवारी २०२४ | फलटण |
कोळकीचे उपसरपंच विकास नाळे यांनी आपला राजीनामा सरपंच सौ. अपर्णा विक्रम पखाले यांच्याकडे दिला असल्याने आगामी काळात कोळकी गावच्या उपसरपंचपदी कोण विराजमान होणार, याकडे आता राजकीय वर्तुळात चर्चांना उधाण आले आहे.
नुकतीच काही दिवसांपूर्वी सरपंचपदाची निवडणूक पार पडली. यामध्ये सौ. अपर्णा विक्रम पखाले यांची सरपंचपदी निवड करण्यात आली आहे.
चालू पंचवार्षिक निवडणुकीत कोळकी गावामध्ये सत्ताधारी राजे गटाचे १३ सदस्य निवडून आले असून राजे गटातून बंडखोरी करून इतर ४ सदस्य निवडून आले आहेत. निवडणूक झाल्यापासून प्रत्येक वर्षी सरपंच, उपसरपंच हे बदलले जात आहेत.
सातारा जिल्हा परिषदेचे माजी अध्यक्ष श्रीमंत संजीवराजे नाईक निंबाळकर यांचे गाव म्हणून ‘कोळकी’ गावाची ओळख आहे. श्रीमंत संजीवराजे नाईक निंबाळकर यांचे मतदान सुद्धा कोळकी गावामध्येच आहे.
सरपंचपदाच्या निवडणुकीत राजे गटात बंडखोरी करून निवडून आलेल्या अपक्ष सदस्यांनी दबाव गट तयार करत त्यांच्या मर्जीतील उमेदवार सरपंचपदी विराजमान केला आहे. त्यामुळे आता आगामी काळामध्ये उपसरपंचपदासाठी राजे गटासोबत असलेल्या निष्ठावंत सदस्यांची मते विचारात घेतली जाणार का? याची चर्चा सध्या कोळकीच्या राजकीय वर्तुळात सुरू आहे.
