खटकेवस्ती जि.प. शाळेचा डंका; क्रीडा, विज्ञान आणि वक्तृत्व स्पर्धेत विद्यार्थ्यांनी पटकावले यश
फलटण तालुक्यातील जिल्हा परिषद शाळा खटकेवस्तीच्या विद्यार्थ्यांनी जिल्हास्तरीय बुद्धिबळ, विज्ञान प्रदर्शन आणि वक्तृत्व स्पर्धेत घवघवित यश संपादन केले आहे. वज्रेश्वरी जाधव, श्रावणी वळकुंदे आणि विज्ञान टीमची कामगिरी. वाचा सविस्तर.
स्थैर्य, फलटण, दि. १० डिसेंबर : फलटण तालुक्यातील जिल्हा परिषद प्राथमिक शाळा, खटकेवस्ती येथील विद्यार्थ्यांनी शैक्षणिक वर्षात (२०२५-२६) विविध स्पर्धांमध्ये लक्षणीय यश मिळवले आहे. जिल्हास्तरीय क्रीडा स्पर्धा असो किंवा तालुकास्तरीय विज्ञान प्रदर्शन, या विद्यार्थ्यांनी आपल्या गुणवत्तेची छाप पाडली आहे. नुकत्याच झालेल्या स्पर्धेत शाळेच्या विद्यार्थ्यांनी बुद्धिबळ, प्रश्नमंजुषा आणि वक्तृत्व स्पर्धेत अव्वल क्रमांक पटकावला आहे.
जिल्हास्तरीय बुद्धिबळ स्पर्धेत यश
मेगा सिटी म्हसवड येथे पार पडलेल्या ‘स्वर्गीय यशवंतराव चव्हाण बाल क्रीडा स्पर्धा २०२५-२६’ अंतर्गत जिल्हास्तरीय बुद्धिबळ स्पर्धेत खटकेवस्ती शाळेच्या मुलींनी यश मिळवले.
-
कु. वज्रेश्वरी संग्राम जाधव: द्वितीय क्रमांक
-
कु. श्रावणी गणपत वळकुंदे: तृतीय क्रमांक
विज्ञान प्रश्नमंजुषेत द्वितीय क्रमांक
फलटण येथील प्रोग्रेसिव्ह कॉन्व्हेंट स्कूलमध्ये ५३ व्या तालुकास्तरीय विज्ञान प्रदर्शनाचे आयोजन करण्यात आले होते. या प्रदर्शनातील ‘प्रश्नमंजुषा’ स्पर्धेत खटकेवस्ती शाळेच्या अनुराज राजेंद्र वळकुंदे, अथर्व संजय खटके आणि समर्थ वैभव खटके या विद्यार्थ्यांच्या गटाने द्वितीय क्रमांक मिळवला.
वक्तृत्व आणि इतर स्पर्धांमधील कामगिरी
स्वर्गीय यशवंतराव चव्हाण व्यक्तिमत्व विकास स्पर्धेअंतर्गतही विद्यार्थ्यांनी यश मिळवले आहे:
-
तालुकास्तरीय वक्तृत्व स्पर्धा: कु. वज्रेश्वरी संग्राम जाधव (द्वितीय क्रमांक).
-
पवारवाडी केंद्रस्तरीय वक्तृत्व स्पर्धा: तन्वी अक्षय खटके (प्रथम क्रमांक).
-
बरड बीटस्तरीय प्रश्नमंजुषा: लहान व मोठा गटात शाळेला तृतीय क्रमांक मिळाला.
गुरुजनांचे मार्गदर्शन आणि कौतुक
विद्यार्थ्यांच्या या यशामागे मुख्याध्यापक लालासो भोसले आणि शिक्षकवृंदाचे मोलाचे मार्गदर्शन आहे. विद्यार्थ्यांना श्री. सुनील तिवाटणे, सौ. उर्मिला वसव, श्री. दादासाहेब नरळे, सौ. लता जगताप, श्री. शरद जठार, सौ. वैशाली सस्ते, सौ. रसिका शिंदे आणि सौ. सुषमा पाटील यांनी मार्गदर्शन केले.
या सर्व गुणवंत विद्यार्थ्यांचे शाळा व्यवस्थापन समितीचे अध्यक्ष राजेंद्र वळकुंदे, गटशिक्षणाधिकारी सी.जी. मठपती, बीआरसीच्या सौ. कुंभार मॅडम, केंद्रप्रमुख संजय धुमाळ आणि खटकेवस्ती ग्रामस्थांनी अभिनंदन केले आहे.
