आघाडी करून लढणार; कामगार संघर्ष संघटना फलटण नगरपालिकेच्या रिंगणात
स्थैर्य, फलटण, दि. १६ ऑक्टोबर : आगामी फलटण नगरपालिका निवडणुकीच्या पार्श्वभूमीवर शहरातील राजकीय समीकरणे जुळत असताना, कामगार संघर्ष संघटनेने इतर पक्षांसोबत युती करून निवडणूक लढवण्याची घोषणा केली आहे. संघटनेचे सातारा जिल्हा युथ अध्यक्ष सुरजभाऊ भैलुमे यांनी ही माहिती दिली असून, शहरातील काही प्रमुख प्रभागांमध्ये उमेदवार उभे करून ते पूर्ण ताकदीने निवडून आणण्याचा निर्धार त्यांनी व्यक्त केला आहे.
कामगार संघर्ष संघटनेने शहरातील प्रभाग क्रमांक १, २, ३, ५, ७ आणि १० या प्रभागांमध्ये लक्ष केंद्रित केले आहे. या प्रभागांमध्ये इतर पक्षांसोबत आघाडी करून उमेदवार दिले जातील, असे भैलुमे यांनी स्पष्ट केले. या घोषणेमुळे या प्रभागांमधील पारंपरिक राजकीय लढती अधिक चुरशीच्या होण्याची शक्यता निर्माण झाली आहे.
आपल्या भूमिकेविषयी बोलताना सुरजभाऊ भैलुमे म्हणाले, “कामगार संघर्ष संघटना ही सर्व समाजाच्या हितासाठी लढणारी संघटना आहे. शिक्षण, रोजगार, आरोग्य, वीज आणि पाणी यांसारख्या मूलभूत सुविधा नागरिकांना मिळवून देण्यासाठी आमचे पदाधिकारी रात्रंदिवस काम करत असतात. आता नागरिकांच्या हक्कांसाठी आणि समाजाच्या हितासाठी लढण्याकरिता सत्तेत जाण्याची संधी आली आहे.”
संघटनेने आतापर्यंत आंदोलने आणि निवेदनांच्या माध्यमातून नागरिकांचे प्रश्न मांडले आहेत. मात्र, आता थेट निवडणुकीच्या रिंगणात उतरून लोकप्रतिनिधींच्या माध्यमातून हे प्रश्न अधिक प्रभावीपणे सोडवण्याचा संघटनेचा मानस आहे. सत्तेत आल्यास नागरिकांच्या समस्यांना प्राधान्य दिले जाईल, असे आश्वासनही त्यांनी दिले.
मतदारांना आवाहन करताना भैलुमे म्हणाले, “मतदार हेच आमचे माय-बाप आहेत. ते आमच्यावर नक्कीच विश्वास ठेवतील आणि आम्हाला लढण्याची ऊर्जा देतील. आम्ही निश्चित केलेल्या प्रभागांमध्ये आम्हाला मतदारांची साथ हवी आहे.”
कामगार आणि सर्वसामान्य नागरिकांच्या प्रश्नांवर आवाज उठवणारी संघटना म्हणून कामगार संघर्ष संघटनेची ओळख आहे. आता निवडणुकीच्या राजकारणात थेट प्रवेश करण्याच्या त्यांच्या निर्णयामुळे फलटणमधील राजकीय वर्तुळात नव्या समीकरणांची नांदी झाली आहे. त्यांच्या या भूमिकेमुळे प्रस्थापित राजकीय पक्षांसमोर नवे आव्हान उभे राहू शकते, अशी चर्चा सुरू झाली आहे.
