प्रभाग १० मधून खासदार गटाकडून जयश्री भुजबळ यांचे पारडे जड; निष्ठा आणि जनसंपर्कामुळे नाव आघाडीवर
स्थैर्य, फलटण, दि. 14 नोव्हेंबर : फलटण नगरपरिषदेच्या आगामी निवडणुकीच्या रणधुमाळीत प्रभाग क्रमांक १० (ओबीसी महिला राखीव) मधील लढत लक्षवेधी ठरण्याची चिन्हे आहेत. या प्रभागातून खासदार गटाकडून (महायुती) जयश्री रणजीत भुजबळ यांचे नाव आघाडीवर असून, त्यांची दांडगा जनसंपर्क पाहता त्यांचे पारडे जड मानले जात आहे.
जयश्री भुजबळ यांनी नुकतेच आपल्या शेकडो समर्थकांसह जोरदार शक्तीप्रदर्शन करत उमेदवारीसाठी मुलाखत दिली होती. यावेळी उपस्थित असलेली महिलांची लक्षणीय संख्या आणि कार्यकर्त्यांचा उत्साह पाहता, खासदार गटाकडून त्यांनाच पहिली पसंती मिळण्याची शक्यता वर्तवली जात आहे.
विशेष म्हणजे, जयश्री भुजबळ यांनी २०१६ च्या नगरपरिषद निवडणुकीत याच प्रभागातून अपक्ष उमेदवारी अर्ज दाखल केला होता. मात्र, त्यावेळी पक्षश्रेष्ठींनी दिलेल्या आदेशाचा मान राखत आणि पक्षावरील निष्ठेपोटी त्यांनी आपली उमेदवारी मागे घेतली होती. पक्षाशी असलेली ही निष्ठा आणि त्यागाची भूमिका लक्षात घेऊन, यावेळी त्यांना संधी मिळावी, अशी आग्रही मागणी खासदार गटातील कार्यकर्त्यांकडून होत आहे.
जयश्री भुजबळ यांचे पती रणजीत भुजबळ हे आमदार सचिन पाटील यांच्या नेतृत्वाखाली फलटण शहरात सक्रिय आहेत. पक्ष संघटना मजबूत करण्यात आणि खासदार गटाची विचारधारा पोहोचवण्यात त्यांचा मोलाचा वाटा आहे. भुजबळ दांपत्य प्रभागातील विविध विकासकामांसाठी आणि नागरिकांच्या समस्या सोडवण्यासाठी नेहमीच तत्पर असते, ही त्यांची जमेची बाजू आहे.
प्रभाग क्रमांक १० मध्ये ओबीसी महिला आरक्षण असल्याने अनेक इच्छुक उमेदवार स्पर्धेत आहेत. मात्र, भुजबळ यांनी केलेले शक्तीप्रदर्शन, त्यांचा थेट जनसंपर्क आणि जुनी निष्ठा यामुळे इतर इच्छुकांच्या तुलनेत त्यांचे स्थान भक्कम झाले आहे. खासदार गटाने ‘निवडून येण्याची क्षमता’ (Elective Merit) हा निकष लावल्यास जयश्री भुजबळ यांचे नाव निश्चित मानले जात आहे.
प्रभागातील मतदारांशी असलेला त्यांचा थेट संपर्क आणि महिला वर्गाचा त्यांना मिळणारा पाठिंबा, यामुळे विरोधकांसमोर त्यांनी मोठे आव्हान उभे केले आहे. आता खासदार गटाचे नेतृत्व अधिकृतरीत्या त्यांच्या गळ्यात उमेदवारीची माळ कधी घालणार, याकडे प्रभागातील नागरिकांचे लक्ष लागले आहे. २०१६ मधील निष्ठेचे फळ त्यांना या निवडणुकीत मिळणार, असे चित्र सध्या तरी स्पष्ट दिसत आहे.
