प्रभाग १० मधून जयश्री भुजबळ यांचे जोरदार शक्तीप्रदर्शन; राष्ट्रवादीकडे उमेदवारीची मागणी
स्थैर्य, फलटण, दि. ९ नोव्हेंबर : फलटण नगरपरिषदेच्या आगामी निवडणुकीसाठी प्रभाग क्रमांक १० मधून (ओबीसी महिला राखीव) जयश्री रणजीत भुजबळ यांनी राष्ट्रवादी काँग्रेस पक्षाकडे उमेदवारीची जोरदार मागणी केली आहे. आज त्यांनी आपल्या शेकडो समर्थकांसह जोरदार शक्तीप्रदर्शन करत मुलाखतीसाठी हजेरी लावली.
जयश्री भुजबळ यांनी २०१६ च्या नगरपरिषद निवडणुकीत याच प्रभागातून अपक्ष उमेदवारी अर्ज दाखल केला होता. मात्र, त्यावेळी पक्षश्रेष्ठींनी दिलेल्या आदेशाचा मान राखत आणि पक्षावरील निष्ठेपोटी त्यांनी आपली उमेदवारी मागे घेतली होती. पक्षाशी असलेली ही निष्ठा लक्षात घेऊन आणि मागील त्याग पाहता यावेळी त्यांना संधी मिळावी, अशी आग्रही मागणी त्यांच्या समर्थकांकडून होत आहे.
जयश्री भुजबळ यांचे पती रणजीत भुजबळ हे आमदार सचिन पाटील यांच्या नेतृत्वाखाली फलटण शहरात सक्रिय आहेत. पक्ष संघटना मजबूत करण्यात त्यांचा मोलाचा वाटा आहे. त्यांच्या या सातत्यपूर्ण कार्याची दखल घेऊन जयश्री भुजबळ यांना उमेदवारी मिळावी, असा आग्रह कार्यकर्त्यांनी धरला आहे.
आज उमेदवारी मागणीदरम्यान भुजबळ समर्थकांनी मोठी गर्दी केली होती. यामध्ये महिलांची उपस्थिती लक्षणीय होती. प्रभागातील विविध विकासकामांसाठी आणि नागरिकांच्या समस्या सोडवण्यासाठी भुजबळ दांपत्य नेहमीच तत्पर असते, अशी भावना यावेळी उपस्थित नागरिकांनी व्यक्त केली.
राष्ट्रवादी काँग्रेस पक्ष आणि आमदार सचिन पाटील यांनी नेहमीच निष्ठावंत आणि तळागाळात काम करणाऱ्या कार्यकर्त्यांना न्याय देण्याची भूमिका घेतली आहे. पक्षाच्या सर्वसामान्य जनतेपर्यंत पोहोचण्याच्या आणि शहराचा सर्वांगीण विकास करण्याच्या धोरणाशी आपण बांधील असल्याचे भुजबळ यांनी यावेळी स्पष्ट केले.
प्रभाग क्रमांक १० मध्ये ओबीसी महिला आरक्षण असल्याने अनेक इच्छुक उमेदवार स्पर्धेत आहेत. मात्र, भुजबळ यांनी केलेले शक्तीप्रदर्शन आणि त्यांची जुनी निष्ठा यामुळे त्यांचे पारडे जड मानले जात आहे. प्रभागातील मतदारांशी असलेला त्यांचा थेट संपर्क ही त्यांची जमेची बाजू मानली जाते.
आता पक्षश्रेष्ठी काय निर्णय घेतात, याकडे सर्वांचे लक्ष लागले आहे. २०१६ मध्ये दाखवलेली निष्ठा यावेळी फळाला येणार का आणि त्यांना पक्षाची अधिकृत उमेदवारी मिळणार का, हे पाहणे औत्सुक्याचे ठरणार आहे.
