निरा-देवघरच्या पाण्याचा शिखर शिंगणापूरच्या शंभू महादेवाला जलाभिषेक; भाजपाच्या अमित रणवरे व कार्यकर्त्यांचा उपक्रम
दैनिक स्थैर्य | दि. १६ ऑगस्ट २०२३ | फलटण |
माजी खासदार स्वर्गीय हिंदूरावजी नाईक निंबाळकर यांच्या स्वप्नातील निरा देवघर प्रकल्पाच्या पाण्याचा जलाभिषेक त्यांच्या जयंतीनिमित्त शिखर शिंगणापूरच्या शंभू महादेवाला घालून त्यांची जयंती उत्साहात साजरी करण्यात आली.
भारतीय जनता पार्टीच्या युवा कार्यकर्त्यांनी या जलाभिषेकाचे आयोजन केले होते. यावेळी फलटण तालुका भाजपचे युवा नेते अमित रणवरे, संतोष गावडे, चंद्रसेन कदम, रणजित जाधव, विशाल नलवडे, योगेश जाधव, आदर्श खटके, उद्योग बडवे, अनिल बडवे, रणजित निंबाळकर, स्वप्निल रणवरे, अमोल रणवरे, शंभूराज रणवरे यांची प्रमुख उपस्थिती होती.
माजी खासदार स्वर्गीय हिंदूराव नाईक निंबाळकर यांनी संघर्ष केलेल्या व त्यांचे पुत्र विद्यमान खासदार रणजितसिंह नाईक निंबाळकर हे पूर्णत्वास घेऊन जात असलेल्या नीरा देवघरच्या पाण्याने शंभू महादेवाला जलाभिषेक घालून त्यांची जयंती साजरी करण्याचा संकल्प फलटण तालुका भारतीय जनता पार्टीच्या युवा कार्यकर्त्यांनी केला होता. तो आज त्यांनी त्यांच्या जयंतीच्या दिवशी शंभू महादेवाला निरा देवघरच्या पाण्याचा जलाभिषेक घालून पूर्ण केला.
दरम्यान, माजी खासदार हिंदूराव नाईक निंबाळकर स्वतः खासदार असताना स्वतःच्या सरकारच्या विरोधात याच शंभू महादेवाला अभिषेक करून त्यांनी पाण्यासाठी पायी दिंडी काढली होती.
ज्यावेळेस लाभक्षेत्रात नीरा देवघरचे पाणी वाहू लागेल, त्यावेळेस पुन्हा एकदा लाभक्षेत्रात आलेल्या पाण्याच्या ठिकाणावरून ते शिखर शिंगणापूरच्या महादेवापर्यंत पायी दिंडी काढून माजी खासदार हिंदूराव नाईक निंबाळकर यांच्या जयंतीदिवशी जलाभिषेक घातला जाईल, असा संकल्प अमित रणवरे व कार्यकर्त्यांनी केला आहे.
