स्वतःला फिक्स नगरसेवक समजणार्यांची घालमेल; उद्या प्रकाशित होणार नगरपरिषदेची प्रारूप प्रभाग रचना
दैनिक स्थैर्य । दि. ०९ मार्च २०२२ । फलटण । कोरोनाच्या व ओबीसी आरक्षणाच्या प्राश्वभुमीवर प्रलंबित राहिलेल्या नगरपरिषदांच्या निवडणुकीच्या प्रारूप प्रभाग रचनेचा कार्यक्रम राज्य निवडणुक आयोगाने काही दिवसांपूर्वी जाहीर केलेला आहे. त्यानुसार फलटण नगरपरिषदेची प्रारूप प्रभाग रचना उद्या दि. १० मार्च रोजी जिल्हाधिकार्यांच्या मार्फत प्रकाशित होणार आहे. त्यामुळे स्वतःला भावी व फिक्स नगरसेवक समजणाऱ्यांची घालमेल सुरू झालेली आहे. प्रभाग रचनेबाबत गेले अनेक दिवस फलटण शहराच्या चौकाचौकांमध्ये चर्चा सुरू आहेत. पण नक्की कुणाचा प्रभाग कसा आहे, हे कोणालाही माहीत नव्हते. आता उद्या प्रभाग रचना प्रकाशित झाल्यावरच नक्की कसे प्रभाग झाले आहेत, हे समोर येणार आहे.
याबाबत अधिक माहिती अशी की, दि. ०२ मार्च पर्यंत फलटण नगरपरिषदेसह राज्यातील “ब” वर्ग नगरपरिषदेचे मुख्याधिकारी हे शहराची प्रभाग रचना ही जिल्हाधिकारी यांच्याकडे सादर करण्यात आलेली आहे. त्यानंतर जिल्हाधिकारी यांनी सदरील प्रभाग रचनेस मान्यता देवुन ती उद्या दि. १० मार्च रोजी प्रारूप प्रभाग रचना व नकाशे रहिवाश्यांच्या माहितीसाठी व हरकतीसाठी प्रकाशित करण्यात येणार आहे.
दि. १० मार्च ते दि. १७ मार्च पर्यंत स्थानिक रहिवाश्यांना प्रारूप प्रभाग रचनेवर हरकती व सुचना नोंदवण्यात येणार आहे. दाखल झालेल्या हरकती व सुचनांवर दि. २२ मार्च रोजी जिल्हाधिकारी यांच्या आदेशाने सुनावणी होणार आहे.
दि. २५ मार्च पर्यंत दाखल झालेल्या हरकती व सुचनांच्या अनुषंगाने जिल्हाधिकारी यांनी अहवाल राज्य निवडणूक आयोगाकडे सादर करावयाचा आहे. तर त्यावर दि. ०१ एप्रिल पर्यंत “ब” वर्ग नगरपरिषदांच्या अंतिम प्रभाग रचनेस राज्य निवडणूक आयुक्त मान्यता देणार आहेत.
