“अजितदादांना खरी श्रद्धांजली द्यायची असेल तर अध्यक्षपद राष्ट्रवादीला द्या!” उद्योगपती अशोक सस्ते यांचे मुख्यमंत्री व उपमुख्यमंत्र्यांना पत्र
सातारा जिल्हा परिषद अध्यक्षपद राष्ट्रवादी काँग्रेसच्या प्रतिनिधीला देऊन दिवंगत अजितदादा पवार यांना खरी श्रद्धांजली अर्पण करावी, अशी मागणी सस्तेवाडी (ता. फलटण) येथील उद्योगपती अशोक सस्ते यांनी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्याकडे एका विशेष पत्राद्वारे केली आहे.
स्थैर्य, फलटण, दि. २८ फेब्रुवारी : सातारा जिल्हा परिषदेच्या आगामी अध्यक्ष निवडीच्या पार्श्वभूमीवर राजकीय हालचालींना वेग आला आहे. याच दरम्यान, फलटण तालुक्यातील सस्तेवाडी येथील प्रगतशील उद्योगपती अशोक सस्ते यांनी राज्याचे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांना एक अत्यंत भावनिक आणि राजकीयदृष्ट्या महत्त्वपूर्ण पत्र लिहिले आहे. “अजितदादांना खरी श्रद्धांजली अर्पण करायची असेल, तर सातारा जिल्हा परिषदेच्या अध्यक्षपदासाठी राष्ट्रवादी काँग्रेस पक्षाच्या प्रतिनिधीस संधी द्यावी,” अशी थेट मागणी त्यांनी या पत्रातून केली आहे.
‘आम्ही तिघे भाऊ-भाऊ’ या नात्याची करून दिली आठवण
अशोक सस्ते यांनी आपल्या पत्रात राज्यातील महायुती सरकारच्या नेतृत्वातील समन्वयाचा आवर्जून उल्लेख केला आहे. ते पत्रात म्हणतात, “आपण दोघेही राज्याच्या राजकारणात समन्वय, स्थैर्य आणि विकास यांचा संदेश सातत्याने देत आहात. ‘आम्ही तिघे भाऊ-भाऊ आहोत’ ही आपण व्यक्त केलेली भावना महाराष्ट्रातील जनतेला एकत्रित नेतृत्वाची जाणीव करून देते.”
माजी उपमुख्यमंत्री अजित पवार दादांच्या आकस्मिक निधनानंतर मुख्यमंत्री फडणवीस यांनी व्यक्त केलेल्या “दादांची वेळ चुकली” या शब्दांची आठवण करून देत सस्ते यांनी नमूद केले की, हे शब्द अत्यंत भावनिक आणि मन हेलावून टाकणारे होते. सातारा जिल्ह्यातील जनतेच्या मनात दादांबद्दल अपार आदर आणि आपुलकी आहे.
‘सातारा जिल्ह्याचा निर्णय केवळ सत्तेचा विषय नाही’
सातारा जिल्ह्याच्या ऐतिहासिक परंपरेचा दाखला देत या पत्रात पुढे म्हटले आहे की, “हा सातारा जिल्हा स्व. यशवंतराव चव्हाण यांच्या कार्याची पावन भूमी आहे. या भूमीत अनेक क्रांतीवीरांनी समाजासाठी आपले जीवन अर्पण केले आहे. त्यामुळे येथे घेतला जाणारा प्रत्येक राजकीय निर्णय हा केवळ सत्तेचा विषय नसून तो येथील जनतेच्या भावना, परंपरा आणि विचारांचा सन्मान करणारा असतो.”
राष्ट्रवादीला अध्यक्षपद देऊन विचारांचा सन्मान करा
याच पार्श्वभूमीवर सातारा जिल्ह्याच्या भावना लक्षात घेण्याची विनंती सस्ते यांनी केली आहे. “मा. अजित दादांना खरी श्रद्धांजली अर्पण करायची असेल, तर सातारा जिल्हा परिषदेच्या अध्यक्षपदासाठी राष्ट्रवादी काँग्रेस पक्षाच्या प्रतिनिधीस संधी देण्याचा सकारात्मक निर्णय घ्यावा, ही सातारा जिल्ह्यातील नागरिकांची रास्त अपेक्षा आहे. हा निर्णय केवळ राजकीय समन्वयाचा संदेश देणार नाही, तर दादांच्या सहकार्याच्या आणि विकासाच्या विचारांना योग्य मान देणारा ठरेल,” असा विश्वास त्यांनी व्यक्त केला आहे.
उपमुख्यमंत्र्यांना साकडे: ‘कृतीतून प्रचिती द्या’
पत्राच्या शेवटी उपमुख्यमंत्री एकनाथ शिंदे यांना विशेष साकडे घालत सस्ते यांनी लिहिले आहे की, “मा. उपमुख्यमंत्री शिंदे साहेब, आपणही या निर्णयासाठी पुढाकार घेऊन नेतृत्वातील एकात्मता आणि ‘भाऊ-भाऊ’ या नात्याची प्रचिती प्रत्यक्ष कृतीतून द्यावी.” राज्याच्या सर्वांगीण विकासासाठी कार्यरत असणाऱ्या दोन्ही नेत्यांनी व्यापक दृष्टिकोनातून आणि जिल्ह्याच्या भावनांचा आदर करून हा निर्णय घ्यावा, अशी नम्र अपेक्षा उद्योगपती अशोक सस्ते यांनी व्यक्त केली आहे.
आता या भावनिक सादेला मुख्यमंत्री आणि उपमुख्यमंत्री कसा व काय प्रतिसाद देतात, याकडे संपूर्ण सातारा जिल्ह्याचे आणि राजकीय वर्तुळाचे लक्ष लागून राहिले आहे.
