फलटणमध्ये स्वातंत्र्यदिन उत्साहात साजरा

दैनिक स्थैर्य । दि. 15 ऑगस्ट 2023 । फलटण । फलटण शहरासह तालुक्यात देशाचा 76 वा स्वातंत्र्यदिन विविध शासकीय कार्यालये, संस्था, शाळा, महाविद्यालये आदी ठिकाणी ध्वजारोहणाच्या कार्यक्रमाने उत्साहात संपन्न झाला. फलटणचे मुख्य शासकीय ध्वजारोहण अधिकारगृहाच्या आवारात उपविभागीय अधिकारी सचिन ढोले यांच्या हस्ते संपन्न झाले.

यावेळी फलटणचे तहसिलदार डॉ.अभिजीत जाधव, पंचायत समितीचे गटविकास अधिकारी चंद्रकांत बोडरे, फलटण नगरपरिषदेचे मुख्याधिकारी संजय गायकवाड, फलटण तालुका कृषी अधिकारी सागर डांगे, फलटण ग्रामीण पोलीस ठाण्याचे पोलीस निरीक्षक सुनिल महाडिक यांच्यासह महसूल, पोलीस, नगरपरिषद विभागातील अधिकारी, कर्मचारी व फलटणकर नागरिक मोठ्या संख्येने उपस्थित होते.

स्वातंत्र्यदिनानिमित्त माढा लोकसभा मतदारसंघाचे खासदार रणजितसिंह नाईक निंबाळकर यांच्या हस्ते मलठण येथील श्रीमती प्रेमलताई चव्हाण हायस्कूल, फलटण – कोरेगाव विधानसभा मतदारसंघाचे आमदार दीपक चव्हाण यांच्या हस्ते तरडगाव येथे, सातारा जिल्हा परिषदेचे माजी अध्यक्ष श्रीमंत संजीवराजे नाईक निंबाळकर यांच्या हस्ते मुधोजी महाविद्यालय येथे, फलटण कृषी उत्पन्न बाजार समितीचे सभापती श्रीमंत रघुनाथराजे नाईक निंबाळकर यांच्या हस्ते बाजार समिती येथे, फलटणचे उपविभागीय पोलीस अधिकारी राहुल धस यांच्या हस्ते पोलीस परेड ग्राऊंड येथे, गटविकास अधिकारी चंद्रकांत बोडरे यांच्या हस्ते फलटण पंचायत समिती येथे, पोलीस निरीक्षक सुनिल शेळके यांच्या हस्ते फलटण शहर पोलीस स्टेशन येथे तर पोलीस निरीक्षक सुनिल महाडिक यांच्या हस्ते फलटण ग्रामीण पोलीस स्टेशन येथे ध्वजारोहण संपन्न झाले.

स्वातंत्र्यदिनी शहिदांच्या कुटूंबियांचा उपविभागीय अधिकार्‍यांच्या हस्ते सन्मान

देशासाठी प्राण अर्पण करणार्‍या फलटण तालुक्यातील वीर शहिदांच्या कुटूंबियांचा सन्मान उपविभागीय अधिकारी सचिन ढोले यांच्या हस्ते अधिकारगृह परिसरात पार पडला. यामध्ये तरडगाव येथील शहीद जवान हनुमंत गायकवाड यांचे कुटुंबिय श्रीमती रुक्मिणी गायकवाड, कोळकी येथील शहीद जवान शामराव गायकवाड यांचे कुटुंबिय श्रीमती सविता गायकवाड, शेरेचीवाडी येथील शहीद जवान नवनाथ ढेंबरे यांचे कुटुंबिय श्रीमती कमल ढेंबरे, तरडगाव येथील शहीद जवान निलेश चव्हाण यांचे कुटुंबिय श्रीमती ज्योती चव्हाण यांचा समावेश होता.

डॉ.बाबासाहेब आंबेडकर समाजभूषण पुरस्कारर्थींचा गौरव

स्वातंत्र्यदिनानिमित्त फलटण तालुक्यातील डॉ.बाबासाहेब आंबेडकर समाजभूषण पुरस्कार प्राप्त मान्यवरांचा गौरव उपविभागीय अधिकारी सचिन ढोले यांच्या हस्ते संपन्न झाला. यामध्ये दशरथ फुले, रामचंद्र बाबर यांचा समावेश होता.

उत्कृष्ठ कामगिरीबद्दल गौरव

फलटण महसुल विभागामध्ये उत्कृष्ट कामगिरी बजावल्याबद्दल जिल्हाधिकारी जितेंद्र डुडी यांच्यावतीने उपविभागीय अधिकारी सचिन ढोले यांनी फलटण तहसिल कार्यालयातील शिपाई बाळासाहेब टिळेकर व गावकामगार तलाठी लक्ष्मण अहिवळे यांचा गौरव स्वातंत्र्यदिनाच्या कार्यक्रमामध्ये केला.