सातारा जिल्ह्याचे खरे ‘धुरंधर’ रणजितदादाच! जयकुमार गोरे-रणजितसिंहांच्या मैत्रीचा ‘जलवा’; झेडपीत विरोधक चितपट, आगामी ग्रामपंचायतीतही ‘कमळ’ फुलणार!

स्थैर्य, सातारा, दि. २० मार्च : सातारा जिल्हा परिषदेच्या अध्यक्षपदी भारतीय जनता पार्टीच्या सौ. डॉ. प्रियाताई महेश शिंदे आणि उपाध्यक्षपदी श्री. राजूभैय्या भोसले यांची आज निवड झाली. या ऐतिहासिक निवडीनंतर जिल्हा परिषदेच्या वर्तुळात आणि संपूर्ण जिल्ह्याच्या राजकीय पटावर एकाच नावाची आणि एकाच पॅटर्नची जोरदार चर्चा आहे, ती म्हणजे माढा लोकसभा मतदारसंघाचे माजी खासदार रणजितसिंह नाईक निंबाळकर आणि त्यांचा ‘फलटण पॅटर्न’! या निवडणुकीने हे स्पष्टपणे सिद्ध केले आहे की, रणजितदादा हे केवळ फलटण तालुक्यापुरते मर्यादित राहिलेले नाहीत, तर ते संपूर्ण सातारा जिल्ह्याचे खरे राजकीय ‘धुरंधर’ आणि ‘किंगमेकर’ म्हणून समोर आले आहेत.

लोकसभेचा पराभव ते सत्तेचा ‘चौकार’; विजयाची ऐतिहासिक मालिका

राजकारणात पराभवानंतर खचून न जाता फिनिक्स पक्षासारखी भरारी कशी घ्यावी, याचा जिवंत आदर्श रणजितसिंहांनी घालून दिला आहे. लोकसभा निवडणुकीत पराभव स्वीकारावा लागला असला तरी, रणजितदादांनी कुठेही न थांबता नव्या जोमाने बांधणी केली. त्याचेच फळ म्हणजे आज फलटण-कोरेगाव विधानसभेत त्यांचा आमदार (सचिन पाटील) आहे, फलटण नगरपालिकेत (नगराध्यक्ष समशेरसिंह) त्यांची एकहाती सत्ता आहे, नुकत्याच झालेल्या फलटण पंचायत समितीवरही त्यांनी भाजपचा झेंडा फडकवला आहे आणि आता थेट सातारा जिल्हा परिषदेवरही त्यांनी आपले वर्चस्व सिद्ध केले आहे. लोकसभेच्या पराभवानंतर सलग विधानसभा, नगरपालिका, पंचायत समिती आणि जिल्हा परिषद अशा सर्वच पातळ्यांवर स्वतःची सत्ता प्रस्थापित करणारे रणजितदादा हे जिल्ह्यातील ताकदवान नेते ठरले आहेत.

रणजितदादांचा ‘मास्टरस्ट्रोक’; राष्ट्रवादी आणि शिवसेनेला खिंडार

या जिल्हा परिषद अध्यक्ष आणि उपाध्यक्ष पदाच्या निवडीत सर्वात मोठी राजकीय खेळी पाहायला मिळाली. संपूर्ण जिल्ह्यात सध्या एकच चर्चा सुरू आहे ती म्हणजे, या निवडणुकीत राष्ट्रवादी काँग्रेस आणि शिवसेनेचे काही जिल्हा परिषद सदस्य फुटले आहेत. या विरोधी सदस्यांना अचूक हेरून, त्यांना भारतीय जनता पार्टीच्या दृष्टीने वळवण्यात माजी खासदार रणजितसिंह नाईक निंबाळकर यांचे सर्वात मोलाचे आणि निर्णायक योगदान राहिले आहे. दादांच्या याच ‘मास्टरस्ट्रोक’मुळे झेडपीवर भाजपचा झेंडा डौलाने फडकला आहे.

जयकुमार गोरे आणि रणजितसिंहांच्या मैत्रीचा ‘जल्लोष’

राजकारणात मैत्री कशी निभवावी, याचे उत्तम उदाहरण म्हणजे ग्रामविकास मंत्री जयकुमार गोरे आणि माजी खासदार रणजितसिंह नाईक निंबाळकर! या दोन नेत्यांमध्ये गेल्या अनेक वर्षांपासून अत्यंत घट्ट आणि अतूट मैत्री आहे. जिल्हा परिषदेत भाजपची सत्ता आणण्यासाठी मंत्री श्रीमंत छत्रपती शिवेंद्रसिंहराजे भोसले आणि जिल्हाध्यक्ष अतुल भोसले यांच्यासोबत या दोघांनी अचूक रणनीती आखली. अध्यक्ष व उपाध्यक्ष पदाच्या निवडीची घोषणा होताच, विरोधकांना चितपट केल्याच्या आनंदात मंत्री जयकुमार गोरे आणि रणजितसिंह नाईक निंबाळकर या दोन्ही मित्रांनी एकत्र येऊन मोठा जल्लोष साजरा केला.

शब्दांपेक्षा कृती मोठी; पालकमंत्र्यांच्या दुर्दैवी घटनेतून धडा

राजकारणात बढाया मारण्यापेक्षा ‘शांततेत क्रांती’ कशी करावी, हे रणजितसिंहांनी दाखवून दिले आहे. काही दिवसांपूर्वी राज्याचे मंत्री आणि शिवसेनेचे नेते शंभूराज देसाई यांनी फलटण दौऱ्यावर असताना “शिवसेना म्हणजे दहशत, आमच्यापुढे कुणाचीही दहशत चालत नाही,” अशी काहीशी भाषा वापरली होती. मात्र, आज त्यांच्याच नेतृत्वाखालील जिल्ह्यात झेडपी अध्यक्ष निवडीच्या प्रक्रियेदरम्यान एक अनपेक्षित आणि दुर्दैवी घटना घडली. या प्रक्रियेत झालेल्या धक्काबुक्कीत खुद्द पालकमंत्री शंभूराज देसाई यांच्या हाताला गंभीर दुखापत झाली. राजकारणात आक्रमक विधाने करण्यापेक्षा रणजितदादांसारखी शांत आणि रणनीतीपूर्ण खेळीच थेट विजयावर शिक्कामोर्तब करते, हाच संदेश यातून गेला आहे.

आगामी ग्रामपंचायत निवडणुकांची नांदी; मोठ्या इन्कमिंगची शक्यता

आज झालेल्या या जिल्हा परिषद अध्यक्ष व उपाध्यक्ष निवडीने सातारा जिल्ह्याची अनेक राजकीय समीकरणे बदलली आहेत. रणजितदादांच्या या विकास आणि रणनीतीच्या पॅटर्नवर विश्वास ठेवून आगामी काळात शिवसेना आणि राष्ट्रवादी काँग्रेसमधील अनेक जण भारतीय जनता पार्टीत जाहीर प्रवेश करणार असल्याच्या चर्चा आता सुरू झाल्या आहेत. झेडपीच्या या धक्क्याचा आणि बदललेल्या राजकीय वाऱ्याचा खरा प्रत्यय आता येणाऱ्या ग्रामपंचायत निवडणुकीत नक्कीच पाहायला मिळेल!