फलटणमध्ये ‘हनीट्रॅप’चा पर्दाफाश; ग्रामीण पोलिसांकडून एका महिलेसह सातजणांना अटक
दैनिक स्थैर्य | दि. २ सप्टेंबर २०२४ | फलटण |
फलटण शहरातील एका हॉटेल व्यावसायिकाला प्रेमाच्या जाळ्यात अडकवून त्याचे अपहरण करत, त्यास निर्जन ठिकाणी नेऊन मारहाण करून लुटल्याची घटना घडली होती. त्याच्याकडून ४ लाख रुपये खंडणी उकळण्याचा प्रयत्न या टोळीने केला होता. या घटनेनंतर फलटण ग्रामीण पोलिसांनी जलदगतीने तपास करून टोळीतील एका महिलेसह सातजणांना १२ तासांच्या आत पकडून जेरबंद केले आहे.
सजल विलास दोशी (वय ३७, रा. न्यू भारत साडीसेंटर समोर, रविवार पेठ, फलटण) असे त्या फिर्यादी हॉटेल व्यावसायिकाचे नाव असून त्यांनी दि. ३० ऑगस्ट २०२४ रोजी फलटण ग्रामीण पोलीस ठाण्यात येऊन याबाबत तक्रार दिली होती.
या ‘हनीट्रॅप’प्रकरणी फलटण ग्रामीण पोलिसांनी टोळीतील
१) उमेश संजय खोमणे (वय २८, रा. खराडेवाडी, ता. फलटण)
२) गणेश बाळू मदने (वय १९, रा. पाचसर्कल, खामगाव, ता. फलटण)
३) कुमार उर्फ बोक्या लक्ष्मण शिंदे (वय २८, रा. भाडळी खुर्द, ता. फलटण)
४) जयराज उर्फ स्वागत आनंदराव चव्हाण (वय २६, रा. झिरपवाडी, ता. फलटण)
५) आकाश काशिनाथ डांगे (वय ३०, रा. भाडळी बु. ता. फलटण)
६) माया (टोपण नाव) (वय ३०)
७. अनिल गजरे (पूर्ण नाव व पत्ता माहीत नाही)
या सातजणांना अटक केली आहे.
या घटनेची माहिती अशी, सजल विलास दोशी यांचे फलटण शहरामध्ये ‘हॉटेल चॉईस’ या नावाने हॉटेल आहे. मागील चार महिन्यांपासून त्यांच्या हॉटेलमध्ये एक महिला अधूनमधून जेवणाचे पार्सल नेण्यासाठी येत होती. या महिलेचा मोबाईल क्रमांक त्यांच्याकडे होता. तिचे नाव ‘माया’ असे ते सांगत होते. या महिलेची व दोशी यांची ओळख झाल्यानंतर दि. ३० ऑगस्ट २०२४ रोजी ही महिला दोशी यांच्यासोबत फिरायला जाण्यासाठी तयार झाली. दोशी यांनी या महिलेला दि. ३० ऑगस्ट २०२४ रोजी सुरवडी या ठिकाणावरून त्यांच्या मोटरसायकलवर घेतले. त्यानंतर त्यांनी लोणंद, वीर धरण या ठिकाणी फेरफटका मारल्यानंतर ते लॉज शोधत होते. परंतु त्यांना लॉज न मिळाल्याने परत येत असताना त्यांना काळज-बडेखानजवळ दोन व्यक्तींनी अडवून ‘आमच्या बहिणीला कुठे घेऊन फिरत आहात’ असे म्हणून त्यांना मारहाण केली. तसेच त्यांना गाडीवरून रस्त्याच्या बाजूला घेऊन गेले. त्यावेळी त्यांच्यासोबत असलेली महिलाही त्या ठिकाणावरून निघून गेली. त्यानंतर दोशी यांना मारहाण करून रात्री ११ वाजेपर्यंत वरील दोघेही इसम व आणखी एक इसम हे दोषी यांना ‘बलात्काराची केस दाखल करणार आहोत’ अशी धमकी देत होते. यावेळी फिर्यादी दोशी यांच्याकडून बळजबरीने त्या इसमांनी ‘फोन पे’द्वारे २६ हजार रुपये घेतले व फिर्यादी यांना उद्या आणखी ४ लाख रुपये घेऊन येण्यास सांगितले. नाही आला तर त्यांचे नग्न काढलेले व बलात्कार केल्याबाबत वदवून घेतलेले व्हिडिओ व्हायरल करण्याची धमकी दिली, अशी तक्रार फलटण ग्रामीण पोलिसात फिर्यादी दोशी यांनी दिली.
या तक्रारीनंतर ग्रामीण पोलिसांनी गोपनीय माहिती काढून टोळीतील महिलेचा शोध घेऊन तिला ताब्यात घेतले व तिच्याकडे तपास केला असता, फलटण शहरामधील रेकॉर्डवरील वरील गुन्हेगार या महिलेच्या मदतीने प्रत्यक्ष फिर्यादीला लुटत होते व काही लोक हे मोबाईलद्वारे इतर आरोपींच्या संपर्कात राहून आरोपीला ‘हनीट्रॅप’मध्ये अडकून सुव्यवस्थितपणे कट करून फिर्यादीकडून पैसे काढत होते, असे आढळून आले. पोलिसांनी कसून तपास करून वरील आरोपींना अटक केली आहे.
या टोळीने फलटण, लोणंद या भागातील अनेक लोकांना यापूर्वी ‘हनीट्रॅप’मध्ये अडकवलेले असण्याची शक्यता पोलिसांनी व्यक्त केली आहे. अशा लोकांनी आपल्या संबंधित पोलीस ठाण्याशी किंवा फलटण ग्रामीण पोलीस ठाण्याशी संपर्क करावा, असे पोलिसांनी आवाहन केले आहे
ही कारवाई पोलीस अधीक्षक समीर शेख, अपर पोलीस अधीक्षक वैशाली कडुकर व उपविभागीय पोलीस अधिकारी राहुल धस यांच्या मार्गदर्शनाखाली फलटण ग्रामीण पोलीस ठाण्याचे पोलीस निरीक्षक सुनील महाडिक यांच्या नेतृत्वाखाली गुन्हे प्रकटीकरण विभागाचे सहायक पोलीस निरीक्षक विशाल वायकर, शिवाजी जायपत्रे, पोलीस उपनिरीक्षक गोपाल बदने, मच्छिंद्र पाटील, पोलीस अमंलदार नितीन चतुरे, वैभव सूर्यवंशी, श्रीनाथ कदम, संदीप मदने, अमोल जगदाळे, श्रीकांत खरात, हनुमंत दडस, रशिदा पठाण यांनी केली आहे.
या घटनेच्या अनुषंगाने फलटण ग्रामीण पोलीस ठाण्यास गुन्हा नोंद असून पुढील तपास पोलीस उपनिरीक्षक गोपाल बदने करीत आहेत.
