निंबळक येथील ऐतिहासिक ‘हेळ’चे पुनरुज्जीवन! उद्योजक रामसाहेब निंबाळकरांच्या पुढाकाराने वारसा जतन; ग्रामस्थांकडून विशेष आभार

निंबळक (भोसले वस्ती) येथील अनेक वर्षांपासून दुर्लक्षित असलेल्या पुरातन आणि ऐतिहासिक ‘हेळ’चे (पाण्याचे कुंड) उद्योजक रामसाहेब निंबाळकर यांच्या पुढाकाराने उत्कृष्टरीत्या पुनरुज्जीवन करण्यात आले असून, यामुळे परिसरातील जलसाठ्यात वाढ होणार आहे.

स्थैर्य, निंबळक, दि. 22 मार्च : निंबळक (ता. फलटण) येथील भोसले वस्तीमधील पुरातन आणि ऐतिहासिक ‘हेळ’ (पाण्याचे कुंड) गेल्या अनेक वर्षांपासून अत्यंत दुर्लक्षित अवस्थेत पडले होते. मात्र, या ऐतिहासिक वारशाचे महत्त्व ओळखून उद्योजक रामसाहेब निंबाळकर यांनी घेतलेल्या विशेष पुढाकारातून या कुंडाचे नुकतेच यशस्वी पुनरुज्जीवन करण्यात आले आहे. त्यांच्या या लोकोपयोगी कार्यामुळे गावाला जणू एक नवा जलस्रोत मिळाला आहे.

पाण्याच्या या ऐतिहासिक स्रोताच्या संवर्धनाचे काम अत्यंत उत्कृष्ट दर्जाचे झाले असून, यामुळे परिसरातील जलसाठ्यात मोठी वाढ होण्यास मदत होणार आहे. यासोबतच गावाचा जुना ऐतिहासिक वारसाही पुन्हा एकदा दिमाखात उभा राहिला आहे. या झालेल्या कामाची गुणवत्ता आणि सद्यस्थिती तपासण्यासाठी रामसाहेब निंबाळकर यांनी नुकतीच प्रत्यक्ष घटनास्थळी भेट देऊन पाहणी केली व कामाबाबत समाधान व्यक्त केले.

या पाहणी दौऱ्यावेळी ग्रामस्थांशी संवाद साधताना रामसाहेब निंबाळकर म्हणाले की, “आपल्या पूर्वजांनी निर्माण केलेला आणि आपल्याला दिलेला हा ऐतिहासिक वारसा जतन करणे, ही आपल्या सर्वांचीच नैतिक जबाबदारी आहे. या कुंडाच्या पुनरुज्जीवनामुळे भविष्यात पाण्याचा प्रश्न सुटण्यासोबतच आपला अमूल्य इतिहासही जिवंत राहील.”

रामसाहेब निंबाळकर यांनी स्वतः लक्ष घालून केलेल्या या अत्यंत उपयुक्त आणि लोकहिताच्या कार्याबद्दल परिसरातील आणि विशेषतः भोसले वस्तीमधील नागरिकांनी मोठे समाधान व्यक्त केले असून, सर्वांनी त्यांचे मनापासून विशेष आभार मानले आहेत.