जिल्हा परिषद व पंचायत समितीच्या गट व गणांच्या हरकतींवर सोमवारी पुण्यात सुनावणी
दैनिक स्थैर्य । 31 जुलै 2025 । सातारा । जिल्हा परिषद व पंचायत समिती प्रारुप गट व गण रचनेवर प्राप्त झालेल्या सर्व हरकतींची सुनावणी पुणे येथील झुंबर हॉल, विभागीय आयुक्त कार्यालय, पुणे विभाग, पुणे येथे सोमवार, दि. ४ ऑगस्ट २०२५ रोजी सकाळी ११ वाजता घेणेत येणार आहे. ज्या व्यक्तींनी प्रारुप गट व गण रचनेवर हरकती घेतलेल्या आहेत, त्यांनी वरीलप्रमाणे नमुद ठिकाणास व दिनांकास वेळेत उपस्थित रहावे, असे आवाहन जिल्हाधिकारी संतोष पाटील यांनी केले आहे.
सातारा जिल्ह्यातील ६५ निवडणूक विभाग व १३० निर्वाचक गणांच्या सार्वत्रिक निवडणूकांसाठी सदस्य संख्या निश्चीती व प्रभाग रचनेचा कार्यक्रम जाहीर झालेला आहे.
त्यास अनुसरुन, सातारा जिल्ह्यातील ६५ निवडणूक विभाग व १३० निर्वाचक गणांवर दि. १४ जुलै रोजी प्रारुप प्रभाग रचनेची अधिसूचना प्रसिध्द करणेत आलेली आहे.
दि.१४ जुलै ते दि.२१ जुलै अखेर निवडणूक विभागावर ५६ व निर्वाचक गणावर ४४ अशा एकूण १०० हरकती प्राप्त झालेल्या आहेत.
