‘हर घर तिरंगा’ अभियानांतर्गत फलटणमध्ये १२ ऑगस्टला भव्य तिरंगा रॅलीचे आयोजन
स्थैर्य, फलटण, दि. ०७ ऑगस्ट : शासन निर्देशानुसार ‘हर घर तिरंगा 2025’ या उपक्रमांतर्गत फलटण शहरामध्ये दिनांक १२ ऑगस्ट रोजी सकाळी ९ वाजता भव्य ‘तिरंगा रॅली व तिरंगा प्रतिज्ञा’ कार्यक्रमाचे आयोजन करण्यात आले आहे. फलटण नगर परिषद, तहसील कार्यालय, पंचायत समिती आणि शहरातील सर्व शासकीय कार्यालये यांच्या संयुक्त विद्यमाने हा कार्यक्रम होणार आहे.
या रॅलीमध्ये शहरातील सर्व शासकीय कार्यालयांतील अधिकारी व कर्मचारी, तसेच सर्व शाळांमधील प्राचार्य, शिक्षक आणि विद्यार्थी सहभागी होणार आहेत. यासोबतच, शहरातील सर्व नागरिक, पत्रकार, ज्येष्ठ नागरिक आणि स्वातंत्र्यसैनिकांनी या राष्ट्रभक्तीच्या कार्यक्रमात मोठ्या संख्येने उपस्थित राहावे, असे जाहीर आवाहन प्रशासनाच्या वतीने करण्यात आले आहे.
सकाळी ९ वाजता तहसील कार्यालय, फलटण येथून रॅलीला सुरुवात होईल. रॅलीचा मार्ग पुढीलप्रमाणे असेल: तहसील कार्यालय, महात्मा फुले चौक, गजानन चौक, उमाजी नाईक चौक, महावीर चौक, भारतरत्न डॉ. बाबासाहेब आंबेडकर चौक आणि समारोप छत्रपती शिवाजी महाराज चौक येथे होईल.
