रक्तदानाच्या आवाहनाला कर्तव्य सोशल ग्रुपचा मोठा प्रतिसाद

सौ. वेदांतिकाराजे यांच्यासह ६५ रक्तदात्यांनी केले रक्तदान

स्थैर्य, सातारा, दि. 01 : कोरोना महामारीने संपुर्ण जगाला विळखा घातला असून मानवी जीवनावर भयंकर संकट ओढावले आहे. त्यातच रक्ताचा तुटवडा असल्याने मोठी जीवीत हानी होत आहे. गरजू रुग्णांसाठी रक्त कमी पडू नये म्हणून मुख्यमंत्री उध्दव ठाकरे यांनी रक्तदान करण्याचे आवाहन राज्याला केले होते. या आवाहनाला कर्तव्य सोशल ग्रुपने मोठा प्रतिसाद दिला असून ग्रुपच्या संस्थापिका सौ. वेदांतिकाराजे भोसले यांच्यासह ६५ रक्तदात्यांनी रक्तदान करुन सामाजिक बांधिलकी जोपासली.

कर्तव्य सोशल ग्रुप आणि माऊली ब्लड बँक यांच्यावतीने छ. शाहू अकॅडमी येथे रक्तदान शिबीराचे आयोजन करण्यात आले होते. डॉ. गिरिश पेंढारकर, डॉ. रमन भट्टड, अजित कुबरे, दुर्गा माने, रामचंद्र मोरे, अमित सकटे, रफिक मुलाणी यांच्या मार्गदर्शनाखाली हे शिबीर झाले. सकाळी ९ ते दुपारी २ यावेळेत झालेल्या शिबीरात सौ. वेदांतिकाराजे भोसले यांच्यासह ६५ जणांनी रक्तदान केले. यावेळी सोशल डिस्टनसिंगचे काटेकोर पालन करण्यात आले तसेच मास्क आणि सॅनिटायझरचा वापर करण्यात आला. ग्रुपचे सदस्य प्रकाश नाईक यांनी यावेळी फेसशिल्डचे मोफत वाटप केले.

आपण समाजासाठी काहीतरी देणे लागतो, समाजासाठी काहीतरी केले पाहिजे, ही भावना आजच्या धावपळीच्या युगात कमी होत चालली आहे. प्रत्येकजण आपआपल्या कार्यात व्यस्त असतो. मात्र, कोरोना सारख्या महाभयंकर साथीच्या आजाराने जनजीवन विस्कळीत झाले आहे. कोरोनामुळे सर्वत्र लॉकडाऊनची परिस्थिती गेले दोन-अडीच महिने होती. रक्ताच्या तुटवड्यामुळे गरजू रुग्णांना रक्ताचा पुरवठा होत नाही आणि रक्त नाही म्हणून रुग्णांना प्राण गमवावा लागणे, ही अतिशय चिंताजनक बाब आहे. प्रत्येकाने सामाजिक बांधिलकी जोपासण्यासाठी थोडावेळ काढून रक्तदान केले पाहिजे. आपले रक्त कोणाचा तरी प्राण वाचवणारे असते त्यामुळे रक्तदान हे श्रेष्ठ दान आहे, असे मत सौ. वेदांतिकाराजे भोसले यांनी शिबीराच्या उदघाटनप्रसगी व्यक्त केले. तसेच अडचणीच्या काळात रक्तदान करुन प्रशासनाला आणि आरोग्य विभागाला सहकार्य करणार्‍या रक्तदात्यांचे सौ. वेदांतिकाराजे यांनी आभार मानले.

शिबिर यशस्वी करण्यासाठी कर्तव्य सोशल ग्रुपचे विलास कासार, विजय देशमुख, चंदन घोडके, दीपक भोसले, दिलावर पत्रेवाले, जितेंद्र मोहिते, रवी पवार, राजा महाडीक, प्रकाश नाईक, चंद्रकांत बेबले, महेश यादव, संदीप भणगे, निशिकांत पिसाळ, सौ. सुजाता घोरपडे, सुनिल भोसले, राहूल धनावडे तसेच सह्याद्री प्रतिष्ठान, सारथी सामाजिक सेवा संस्था यांच्या सदस्यांनी परिश्रम घेतले.