राज्यपालांकडून राजभवनाच्या खर्चात कपात

स्थैर्य, मुंबई, दि. 28 : कोरोनामुळे राज्यात निर्माण झालेल्या आर्थिक संकटामुळे राज्य सरकारने सर्वच विभागाच्या खर्चाला कात्री लावली आहे. राज्यपाल भगतसिंह कोश्यारी यांनीही राजभवनाच्या खर्चात कपात करण्याचा निर्णय घेतला असून, राजभवनात नवीन नोकरभरती, बांधकामाला त्यांनी स्थगिती दिली आहे. स्वातंत्र्यदिनाच्या संध्येला 15 ऑगस्ट रोजी पुणे येथील राजभवन येथे राज्यपाल आयोजित करीत असलेला स्वागत समारंभ यंदा रद्द करण्यात येणार आहे. तसेच राजभवनच्या नियमित वार्षिक खर्चातही 10 ते 15 टक्के कपात केली जाणार आहे.

कोरोनाच्या लॉकडाऊनमुळे राज्याचे अर्थचक्र गाळात रुतले आहे. राज्य सरकारने केवळ अत्यावश्यक सेवावगळता इतर विभागातील नवीन नोकरभरती बंद केली असून सर्व विभागांना त्यांच्या मंजूर निधीच्या 33 टक्के निधीच्या खर्चासच अनुमती दिली आहे.आता राज्यपाल भगतसिंह कोश्यारी यांनी देखील राजभवनच्या खर्चात काटकसरीच्या उपाययोजना करण्याचे आदेश दिले आहेत.

राजभवनात आता नवे मोठे बांधकाम हाती घेण्यात येणार नाही. केवळ प्रगतीपथावर असलेली कामेच पूर्ण करण्यात येणार आहेत. राजभवन येथे येणार्‍या देशविदेशातील पाहुण्यांना स्वागताच्या वेळी भेटवस्तू वा स्मृतीचिन्ह देण्यात येणार नाही. कोणतीही नवी नोकर भरतीही करण्यात येणार नाही. स्वातंत्र्यदिनाच्या संध्येला 15 ऑगस्ट रोजी पुणे येथील राजभवन येथे राज्यपाल आयोजित करीत असलेला स्वागत समारंभ यंदा रद्द करण्यात येणार आहे. राजभवनासाठी नवी कार विकत घेण्याचा प्रस्ताव पुढे ढकलण्यात आला आहे. अतिमहत्वाच्या व्यक्तींच्या स्वागताच्या वेळी पुष्पगुच्छ देण्याची प्रथा बंद करण्यात यावी. राजभवन येथील व्हीआयपी अतिथी कक्षांमध्ये फ्लॉवर पॉट तसेच शोभिवंत फुलदाणी ठेवू नये. त्याचसोबत कुलगुरु व अधिकार्‍यांसोबतच्या बैठका व्हिडीओ कॉन्फरन्सव्दारे घेऊन करून प्रवास खर्चात बचत करण्यात येईल. काटकसरीच्या उपाययोजनांमुळे वाचणारा निधी तुलनेने कमी असला तरीही करोना संकटाशी मुकाबला करण्याच्या दृष्टीने तो महत्वपुर्ण ठरेल, असे मत राज्यपालांनी व्यक्त केले आहे.