दोन विमा कंपन्यांची कॅशलेस सुविधा बंद करण्याच्या रुग्णालयांच्या निर्णयाला ‘जीआय कौन्सिल’चा तीव्र विरोध

स्थैर्य, पुणे, दि. २६ ऑगस्ट : असोसिएशन ऑफ हेल्थकेअर प्रोव्हायडर्स (इंडिया) [AHPI] या रुग्णालयांच्या संघटनेने बजाज अलियान्झ आणि केअर हेल्थ इन्शुरन्स या दोन कंपन्यांची कॅशलेस सुविधा १ सप्टेंबर २०२५ पासून बंद करण्याची घोषणा केली आहे. या एकतर्फी निर्णयाला जनरल इन्शुरन्स कौन्सिलने (जीआय कौन्सिल) तीव्र विरोध दर्शवला असून, हा निर्णय म्हणजे नागरिकांच्या हिताला बाधा आणणारा आणि आरोग्य विमा प्रणालीवरील विश्वास कमी करणारा आहे, असे म्हटले आहे.

जीआय कौन्सिलने प्रसिद्ध केलेल्या पत्रकानुसार, AHPI चा हा निर्णय कोणताही सुस्पष्ट तपशील न देता अचानक घेण्यात आला आहे, ज्यामुळे नागरिकांमध्ये अनावश्यक गोंधळ आणि चिंता निर्माण झाली आहे. संवादातून तोडगा काढण्याऐवजी, रुग्णालयांच्या संघटनेने थेट प्रसिद्धीपत्रक काढून देशभरातील पॉलिसीधारकांच्या हिताला बाधा आणली आहे.

रुग्णांच्या जीवाला धोका

कॅशलेस सुविधा बंद केल्याने केवळ रुग्णांना उपचारांसाठी आगाऊ पैसे जमा करावे लागणार नाहीत, तर आपत्कालीन परिस्थितीत तातडीच्या वैद्यकीय मदतीची गरज असलेल्या रुग्णांच्या जीवालाही धोका निर्माण होऊ शकतो, अशी भीती कौन्सिलने व्यक्त केली आहे. आपत्कालीन परिस्थितीत कोणत्याही रुग्णाला कॅशलेस उपचारांपासून वंचित ठेवले जाऊ नये, कारण असे करणे मानवी जीवनाच्या मूल्याला कमी लेखण्यासारखे आहे.

विमा उद्योग एकजूट

जीआय कौन्सिलने म्हटले आहे की, संपूर्ण विमा उद्योग या प्रकरणात एकजूट आहे. विमा कंपन्यांनी २०२३-२४ या आर्थिक वर्षात ८७,००० कोटी रुपयांहून अधिक रकमेचे आरोग्य विमा दावे निकाली काढले आहेत, जे नागरिकांप्रति असलेल्या त्यांच्या वचनबद्धतेचे प्रतीक आहे. ‘कॅशलेस एव्हरीवेअर’ सारख्या उपक्रमातून नागरिकांना आर्थिक अडचणींशिवाय उत्तम आरोग्यसेवा देण्याचा विमा कंपन्यांचा प्रयत्न आहे.

जीआय कौन्सिलने AHPI ला आपला निर्णय तात्काळ मागे घेण्याचे आणि विमा कंपन्यांशी चर्चेतून मार्ग काढण्याचे आवाहन केले आहे, जेणेकरून सर्व पॉलिसीधारकांसाठी कॅशलेस सेवा अखंडपणे सुरू राहील.