‘गाळमुक्त धरण, गाळयुक्त शिवार’ योजनेची राज्यभरात व्याप्ती वाढवणार : उपमुख्यमंत्री एकनाथ शिंदे
सातारा जिल्ह्यातील दरे (ता. महाबळेश्वर) येथे ‘नाम फाउंडेशन’ आणि जिल्हाधिकारी कार्यालयाच्या संयुक्त विद्यमाने कोयना धरणातील गाळ काढण्याच्या मोहिमेचा शुभारंभ उपमुख्यमंत्री एकनाथ शिंदे यांच्या हस्ते करण्यात आला.
स्थैर्य, दरे (महाबळेश्वर), दि. १२ एप्रिल : ‘गाळमुक्त धरण व गाळयुक्त शिवार’ ही महत्त्वाकांक्षी योजना शेतकऱ्यांसह धरण क्षेत्रातील लाभार्थ्यांसाठी अत्यंत उपयुक्त ठरत आहे. त्यामुळे या दुहेरी फायद्याच्या योजनेची व्याप्ती आता संपूर्ण राज्यभरात वाढवणार असल्याचे प्रतिपादन राज्याचे उपमुख्यमंत्री एकनाथ शिंदे यांनी केले.
सातारा जिल्हाधिकारी कार्यालय व ‘नाम फाउंडेशन’ यांच्या संयुक्त विद्यमाने कोयना धरणातील गाळ काढण्याचा महत्त्वपूर्ण कार्यक्रम हाती घेण्यात आला आहे. या मोहिमेचा शुभारंभ दरे (ता. महाबळेश्वर) येथे उपमुख्यमंत्री एकनाथ शिंदे यांच्या हस्ते करण्यात आला. कार्यक्रमाच्या प्रारंभी, महात्मा ज्योतिराव फुले यांच्या जयंतीनिमित्त त्यांच्या प्रतिमेस पुष्पहार अर्पण करून उपमुख्यमंत्र्यांनी अभिवादन केले.
मान्यवरांची उपस्थिती
याप्रसंगी सातारा जिल्ह्याचे जिल्हाधिकारी संतोष पाटील, उपवनसंरक्षक अमोल सातपुते, वाईचे प्रांताधिकारी डॉ. योगेश खरमाटे, साताऱ्याचे प्रांताधिकारी आशिष बारकुल यांच्यासह विविध विभागांचे वरिष्ठ अधिकारी मोठ्या संख्येने उपस्थित होते.
धरणाची क्षमता आणि शेतीची सुपीकता वाढणार
या मोहिमेचे महत्त्व सांगताना उपमुख्यमंत्री म्हणाले, “उन्हाळ्यामध्ये धरणांची पाणीपातळी कमी होते. पाणीपातळी कमी झाल्यावर धरणातील गाळ काढल्यास धरणाची पाणी साठवण्याची क्षमता नैसर्गिकरीत्या वाढते. आणि सर्वात महत्त्वाचे म्हणजे, हा काढलेला गाळ शेतीमध्ये टाकल्यास शेती अधिक सुपीक होते व कृषी उत्पन्नात मोठी वाढ होते. त्यामुळे ही योजना शेतकऱ्यांसाठी फार महत्त्वाची आहे.”
जिल्ह्यातील जास्तीत जास्त शेतकऱ्यांनी धरणांमधील व तलावांमधील हा सुपीक गाळ काढून तो आपल्या शेतात टाकावा आणि आपली शेतजमीन सुपीक करून कृषी उत्पन्न वाढवावे, असे थेट आवाहनही उपमुख्यमंत्री एकनाथ शिंदे यांनी यावेळी शेतकऱ्यांना केले आहे.
