मुलींना शिक्षण मोफत: पालक आणि महाविद्यालयांमध्ये गोंधळ!
दैनिक स्थैर्य | दि. 18 जुलै 2024 | फलटण | राज्य सरकारने शिक्षण घेणाऱ्या मुलींसाठी शिक्षण आणि परीक्षा शुल्क पूर्णत: माफ करण्याचा निर्णय घेतला आहे. मात्र, या निर्णयाची अंमलबजावणी कशी करायची याबद्दल राज्य सरकारकडून अद्याप स्पष्ट मार्गदर्शक तत्त्वे किंवा लेखी परिपत्रक जारी करण्यात आले नाही. त्यामुळे पालक आणि महाविद्यालयांमध्ये मोठी गोंधळाची स्थिती निर्माण झाली आहे.
राज्य सरकारच्या अध्यादेशानुसार, व्‍यावसायिक शिक्षण घेणाऱ्या मुलींना शिक्षण आणि परीक्षा शुल्क माफ करण्यात येणार आहे. मात्र, यात प्रवेश शुल्क समाविष्ट आहे की नाही याबाबत स्पष्टता नाही. त्यामुळे अनेक पालक महाविद्यालयांमध्ये चौकशी करण्यासाठी गर्दी करत आहेत. यामुळे पालक आणि महाविद्यालयांच्या कर्मचाऱ्यांमध्ये वादाचीही स्थिती निर्माण होत आहे.
या निर्णयाची अंमलबजावणी कशी करायची याबद्दल महाविद्यालयांनाही काहीच माहिती नाही. त्यामुळे कोणत्या आधारावर मुलींना प्रवेश द्यायचा आणि त्यांचे शुल्क कसे माफ करायचे याबाबत महाविद्यालये अंधारात आहेत.
यामुळे अनेक पालकांना अनेक प्रश्न पडले आहेत. पूर्ण शुल्क माफ होणार आहे की फक्त शैक्षणिक शुल्क? प्रवेश घेतानाच शुल्क द्यावे लागणार का? प्रवेश शुल्क आधी भरल्यास नंतर ते परत मिळणार का? एकापेक्षा जास्त वर्षासाठीचा अभ्यासक्रम असल्यास माफी होणार का? यंदाचे अभ्यासक्रमाचे शेवटचे वर्ष असल्यास भरलेले शुल्क परत मिळणार का? कोणत्या अभ्यासक्रमासाठी किती शुल्क माफ होणार? असे अनेक प्रश्न पालकांना सतावत आहेत.
महाविद्यालयांनाही अनेक प्रश्न पडले आहेत. प्रवेश शुल्क कसे आकारायचे? शुल्क आकारण्याची नियमावली काय? सरकार कशा प्रकारे प्रतीपूर्ती करणार? कोणत्या अभ्यासक्रमासाठी किती शुल्क माफी होणार? प्रवेशावेळी शुल्क आकारायचे की नाही? चालू वर्षासाठी शुल्क आकारलेले असल्यास परत द्यायचे का? असे अनेक प्रश्न महाविद्यालयांना सतावत आहेत.
या गोंधळामुळे अनेक पालक आणि विद्यार्थी त्रस्त झाले आहेत. राज्य सरकारने तातडीने या निर्णयाची अंमलबजावणी कशी करायची याबाबत स्पष्ट मार्गदर्शक तत्त्वे आणि लेखी परिपत्रक जारी करून या गोंधळाला दूर करणे गरजेचे आहे.
एका पालकाची तक्रार:
“माझी मुलगी आता अभियांत्रिकी पदवीच्या दुसऱ्या वर्षात शिकत आहे. त्यासाठी महाविद्यालयाकडून शिक्षण शुल्क भरण्याचा तगादा सुरू आहे. त्यामुळे फक्त पहिल्याच वर्षी प्रवेश घेणाऱ्या मुलींनाच शुल्क माफ होणार आहे, की अभियांत्रिकीच्या सर्व वर्षातील मुलींचे शुल्क माफ केले जाणार आहे? याबाबत महाविद्यालयांकडून शासनाची नियमावली आली नसल्याचे सांगण्यात येत आहे.
