फलटण उपजिल्हा रुग्णालयातील महिला डॉक्टरची आत्महत्या; हातावरील मजकुराने खळबळ एका पोलीस अधिकाऱ्यावर बलात्काराचा तर दुसऱ्यावर मानसिक त्रासाचा आरोप
स्थैर्य, फलटण, दि. 24 ऑक्टोबर : फलटण उपजिल्हा रुग्णालयातील एका महिला डॉक्टरने आत्महत्या केल्याची धक्कादायक घटना समोर आली आहे. या प्रकरणाला अत्यंत गंभीर वळण मिळाले असून, आत्महत्येपूर्वी त्या डॉक्टरने आपल्या हातावर लिहिलेल्या कथित मजकुरात एका पोलीस उपनिरीक्षकाने (PSI) बलात्कार केल्याचा आणि दुसऱ्या एका पोलीस अधिकाऱ्याने मानसिक त्रास दिल्याच्या आरोपांचा उल्लेख असल्याचे समोर आले आहे. या घटनेने संपूर्ण सातारा जिल्ह्यात खळबळ उडाली आहे.
मिळालेल्या माहितीनुसार, फलटण उपजिल्हा रुग्णालयात कार्यरत असलेल्या या महिला डॉक्टरने आत्महत्या केली. आत्महत्येनंतर पोलिसांना तिच्या हातावर आत्महत्येचे कारण लिहिलेला मजकूर आढळून आला. या कथित सुसाईड नोटमध्ये एका पोलीस उपनिरीक्षकाने चार वेळा बलात्कार केल्याचा आणि दुसऱ्या एका पोलीस अधिकाऱ्याने मानसिक व शारीरिक त्रास दिल्याचा गंभीर आरोप करण्यात आला आहे.
हा धक्कादायक प्रकार उघडकीस आल्यानंतर प्रकरणाचे गांभीर्य वाढले आहे. एका महिला डॉक्टरवर अशा प्रकारे अत्याचार झाल्याचा आणि तिला आत्महत्येस प्रवृत्त केल्याचा आरोप थेट पोलिसांवरच होत असल्याने हे प्रकरण अधिकच संवेदनशील बनले आहे. हातावर लिहिलेल्या या मजकुरामुळे आत्महत्येमागे मोठे षडयंत्र असल्याचा संशय व्यक्त होत आहे.
या घटनेची माहिती मिळताच सातारा जिल्ह्याचे पालकमंत्री शंभूराज देसाई यांनी तातडीने दखल घेतली आहे. त्यांनी सातारा पोलीस अधीक्षकांशी संपर्क साधून त्यांना स्वतः घटनास्थळी भेट देण्याचे आणि प्रकरणाची सखोल चौकशी करण्याचे निर्देश दिले आहेत. या प्रकरणात जे कोणी दोषी आढळतील, मग ते कोणीही असोत, त्यांच्यावर कठोर कारवाई केली जाईल, असे आश्वासन मंत्री देसाई यांनी दिले आहे.
पोलीस अधीक्षक तुषार दोशी यांनीही या प्रकरणाची गंभीर दखल घेतली असून, याप्रकरणी गुन्हा दाखल करण्याची प्रक्रिया सुरू असल्याचे आणि सखोल तपास केला जाईल असे सांगितले आहे. हातावरील मजकूर हा महत्त्वाचा पुरावा मानला जात असून, त्या दिशेने पोलीस तपास करत आहेत.
या घटनेमुळे वैद्यकीय आणि पोलीस प्रशासनात मोठी खळबळ उडाली आहे. एका महिला डॉक्टरला अशा टोकाच्या परिस्थितीतून जावे लागल्याने आणि त्यात पोलिसांचाच सहभाग असल्याचा आरोप झाल्याने, प्रकरणाची निष्पक्ष चौकशी होऊन सत्य समोर यावे, अशी मागणी जोर धरू लागली आहे. पोलीस तपासात काय निष्पन्न होते, याकडे आता सर्वांचे लक्ष लागले आहे.
