के.बी.एक्सपोर्टच्या माध्यमातून शेतकर्‍यांचा फायदा सुरु रहावा : जिल्हाधिकारी शेखर सिंह
दैनिक स्थैर्य । दि.२४ जानेवारी २०२२ । फलटण । के.बी.एक्सपोर्ट कंपनीचे कामकाज समाधानकारक असून कृषी क्षेत्रात या कंपनीचा आलेख उंचावत जाणारा आहे. तो असाच उंचावत जावून या माध्यमातून लाखो शेतकर्‍यांचा फायदा होत रहावा; अशा सदिच्छा सातारा जिल्हाधिकारी शेखर सिंह यांनी के.बी.एक्सपोर्टच्या व्यवस्थापनाला दिल्या.
येथील के.बी.एक्सपोर्ट व के.बी.बायो ऑरगॅनिक्स या कृषी क्षेत्रातील अग्रमानांकित कंपनीला जिल्हाधिकार्‍यांनी नुकतीच कुटूंबियांसमवेत सदिच्छा भेट दिली. यावेळी कंपनीचे संचालक सचिन यादव यांनी जिल्हाधिकार्‍यांचे स्वागत केले. या भेटीवेळी जिल्हाधिकार्‍यांनी कृषी क्षेत्राशी असणारा जिव्हाळा तर व्यक्त केलाच त्यासोबतच त्यांच्या कुटुंबीयांनी देखील जिज्ञासुपणे दोन्ही कंपन्यांची कार्यपद्धती समजून घेतली व संपूर्ण माहिती जाणून घेतली.
कृषी क्षेत्रात एका नावीन्यपूर्ण आणि तितक्याच गरजेच्या असणार्‍या रसायनमुक्त कीटकनाशकांच्या निर्मितीमध्ये एक महत्वाची भूमिका तुम्ही निभावत आहात जी अतिशय उल्लेखनीय बाब आहे, असेही जिल्हाधिकारी शेखर सिंह यांनी यावेळी आवर्जून नमूद केले.
दरम्यान, या भेटीदरम्यान जिल्हाधिकारी शेखर सिंह यांनी सर्व प्रयोगशाळा व त्या अंतर्गत चालणारे काम तसेच संशोधन प्रक्रियेमध्ये कंपनीने केलेल्या प्रगतीचा आढावा घेतला. कंपनीच्या अद्ययावत प्रयोगशाळांचे त्यांनी कौतुक केले. त्यानंतर के. बी. बायो ऑरगॅनिक्सने संशोधित केलेल्या कीटकनाशकांचे मोठ्या प्रमाणावर उत्पादन घेतल्या जाणार्‍या युनिटला देखील भेट दिली. तिथे चालणार्‍या सर्व प्रक्रियेची माहिती जाणून घेतली.
के. बी. बायो ऑरगॅनिक्स कंपनीची माहिती घेतल्यानंतर जिल्हाधिकार्‍यांनी देशातील कृषी निर्यात क्षेत्रात अग्रगण्य असणार्‍या के. बी. एक्स्पोर्टच्या पॅक हाऊसला भेट दिली. यादरम्यान बेबीकोर्न, डाळिंब, भेंडी, दुधी भोपळा, कढीपत्ता इत्यादी पिकांच्या निर्यातीच्या प्रक्रियेमधील विविध टप्प्यांमध्ये होणार्‍या कामाची माहिती त्यांना देण्यात आली. महाराष्ट्रातील विविध भागातील शेतकर्‍यांचा कृषीमाल थेट युरोपच्या बाजारपेठेमध्ये अगदी सर्वोत्तम दर्जा राखून व ताज्या अवस्थेमध्ये पोहोचवला जातो याबाबत तसेच कॉन्ट्रॅक्ट फार्मिंगची सविस्तर माहिती घेतली. तसेच निर्यातीच्या माध्यमातून शेतकर्‍यांना मिळणारा उत्तम परतावा आणि कंपनीच्या भागातील लोकांना उपलब्ध झालेला रोजगार याबद्दल त्यांनी समाधान व्यक्त केले.
कंपनीचे संचालक श्री. सचिन यादव यांनी यावेळी जिल्हाधिकारी श्री. शेखर सिंह आणि त्यांच्या कुटुंबीयांसमवेत संवाद साधला. ज्यादरम्यान त्यांनी के. बी. एक्सपोर्ट व के. बी. बायो ऑरगॅनिक्स या दोन्ही कंपन्यांच्या माध्यमातून शेतकर्‍यांना निर्यातक्षम कृषीमालाचे उत्पादन घेणे व कंपनीच्या माध्यमातून त्याची निर्यात अगदी सहजपणे करणे हे अगदी सहजशक्य झाले आहे याची माहिती दिली.
