‘दिगंबरा, दिगंबरा.. ’च्या जयघोषात सातार्यात दत्तजयंती उत्साहात
सातारा – दत्त जयंती सोहळ्यानिमित्त येथील श्री मुतालिक दत्त मंदिरातील आकर्षक दत्त मूर्ती व दर्शनासाठी झालेली भाविकांची गर्दी. (छायाचित्र – अतुल देशपांडे, सातारा)
स्थैर्य, सातारा, दि. 6 डिसेंबर : दिगंबरा, दिगंबरा.. श्रीपाद वल्लभ दिगंबरा.. या दत्त मंत्राचा जयघोष करत सालाबाद प्रमाणे मार्गशीर्ष महिन्यातील शुक्ल पक्षातील पौर्णिमेला श्री दत्तात्रेय जयंती उत्सव साजरा केला जातो
गुरुवारी सायंकाळी सूर्यास्ताच्या मुहूर्तावर हा दत्तजन्म सोहळा मोठ्या उत्साहात संपूर्ण जिल्ह्यात ठिकठिकाणी मंदिरातून ..अवधूत चिंतन श्री गुरुदेव दत्त.. दिगंबरा, दिगंबरा, श्रीपाद वल्लभ दिगंबरा..च्या जयघोषात साजरा करण्यात आला. प्रतिवर्षाप्रमाणे मार्गशीर्ष महिन्यात या दत्त जयंती सोहळ्या अगोदर सात दिवस श्री गुरुचरित्र पठण पारायण स्वरूपात घरोघरी तसेच सामुदायिक रीतीने करण्याची प्रथा आहे
मागील शुक्रवारपासून या गुरुचरित्र वाचन पारायण सोहळ्यात सुरुवात झाली ,व गुरुवारी या सप्ताहाची सांगता दत्तजन्माने करण्यात आली. सातारा शहरातील प्रतापगंज पेठेतील श्री मुतालिक दत्त मंदिरात यानिमित्त तीन दिवसांचा दत्तजन्म उत्सव मोठ्या उत्साहात संपन्न होत आहे. गुरुवारी सायंकाळी सूर्यास्ताच्या मुहूर्तावर 5 वाजून 59 मिनिटांनी दत्तजन्मोत्सव साजरा करण्यात आला.
यानिमित्त मंदिराला विविध आकर्षक फुलांची तसेच केळीचे आणि नारळाच्या पानांची सजावट करण्यात आली . मंदिरातील संगमरवरी दत्तमूर्तीला अतिशय सुरेख असे गुलाब आणि शेवंती पुष्पांचे हार घालून फुलांची सजावट करण्यात आली होती. दिवसभर साबुदाणा खिचडीचा प्रसाद वितरण करण्यात येत होता. भक्तांनी सकाळपासूनच दर्शनासाठी गर्दी केली होती. या मंदिरात दत्त जयंती सोहळ्यानिमित्त बुधवारी सायंकाळी 11 ब्रह्मवृद्धांच्या उपस्थितीत मंत्र जागर करण्यात आला तसेच गुरुवारी सकाळी दत्त जयंती दिवशी सकाळी दत्त मूर्तीला विशेष पंचामृत स्नान, महाअभिषेक आणि पूजा संपन्न झाल्यावर मंदिरात ब्रह्मवृंदांनी दत्तयाग संपन्न केला .
दिवसभर दर्शनासाठी भाविकांची मोठी गर्दी होती. सायंकाळी 5 पाच ते 7 या वेळेत वेदमूर्ती गोविंदशास्त्री जोशी यांचे जन्मकाळानिमित्त प्रवचन आयोजित करण्यात आले होते. रात्री 8 ते 9 या वेळेत अरविंद कुलकर्णी यांची दत्त भक्तीगीते आणि अभंगवाणी हा सुश्राव्य गायन कार्यक्रम संपन्न झाला. शुक्रवारी सकाळी लघुरुदराने या दत्त जन्मोत्सव तीन दिवशीय सोहळ्याची सांगता होणार आहे अशी माहिती वेदमूर्ती मयूरशास्त्री मेढेकर व श्री .जोशी गुरुजी यांनी दिली. गुरुवारीसकाळपासून रात्री उशिरापर्यंत मंदिरात भाविकांनी दर्शनासाठी गर्दी केली होती.
सातारा शहरातील माची पेठेतील टोपे मामा दत्त मंदिर, पोलीस केंद्र पुढील आनंदवाडी दत्त मंदिर तसेच संगमनगर आणि शहरातील विविध मंदिरात दत्त जयंती सोहळा मोठ्या उत्साहात सायंकाळी संपन्न झाला. गेंडामाळ शाहूपुरी परिसरातील श्री दत्त भक्त मंडळाचे वतीने तीन दिवसांचा विविध कार्यक्रम आयोजित केला असून यामध्ये भजन, प्रवचन, कीर्तन, दत्त जन्मकाळ साजरा करण्यात आला .सातारा जिल्हा नजीकच्या श्रीक्षेत्र नारायणपूर येथेही दत्तभक्तांनी एकमुखी दत्त मंदिरात हा जन्मसोहळा मोठ्या उत्साहात संपन्न केला.सातारा येथून खास दत्त जयंती निमित्त अक्कलकोट गाणगापूर, नरसोबाची वाडी ,नारायणपूर, श्रीक्षेत्र गोंदावले येथे विशेष एसटी बसेस भक्तांच्या सोयीसाठी सोडण्यात आल्या होत्या .
गुरुवारी सायंकाळी दत्तजन्म सोहळा झाल्यावर महाआरती होऊन प्रसाद वितरण करण्यात आला .अनेक दत्त मंदिरात यानिमित्त महाप्रसादाचेही आयोजन करण्यात आले होते .सातारा जिल्ह्यातील विविध एसटी आगारात असलेल्या श्री दत्त मंदिरातही भाविकांनी दर्शनासाठी गर्दी केली होती .तसेच अनेक एसटी कर्मचार्यांनी विशेष वर्गणी काढून येथे महाप्रसादाचे आयोजन केले होते .
