नीरा खोऱ्यातील धरणे तुडुंब; शेतकऱ्यांसह नागरिकांची चिंता मिटली
भाटघर, वीर, नीरा देवघर, गुंजवणी १०० टक्के भरले; नीरा नदीपात्रात पाण्याचा विसर्ग सुरू
स्थैर्य, फलटण, दि. ०७ सप्टेंबर : फलटण तालुक्यासह अनेक भागांची जीवनदायिनी असलेल्या नीरा खोऱ्यातील सर्व प्रमुख धरणे १०० टक्के भरली आहेत. नीरा उजवा कालवा विभाग, फलटण यांच्याकडून आज (दि. ७) सकाळी प्रसिद्ध करण्यात आलेल्या आकडेवारीनुसार, भाटघर, वीर, नीरा देवघर आणि गुंजवणी ही चारही धरणे पूर्ण क्षमतेने भरली असून, यामुळे शेतकरी आणि नागरिकांची पाण्याची चिंता मिटली आहे.
मिळालेल्या माहितीनुसार, नीरा प्रणालीतील चारही धरणांची एकूण ४८.३३ टी.एम.सी. पाणीसाठवण क्षमता असून, आजमितीस धरणांमध्ये ४८.३२ टी.एम.सी. म्हणजेच ९९.९८ टक्के पाणीसाठा उपलब्ध आहे. गेल्या वर्षीच्या तुलनेत (४८.२४ टी.एम.सी.) यंदा पाणीसाठा किंचित जास्त आहे. यामुळे आगामी रब्बी हंगाम आणि पिण्याच्या पाण्याची सोय झाली आहे.
धरणांची सद्यस्थिती आणि विसर्ग:
- भाटघर: २३.५० टी.एम.सी. क्षमतेचे हे धरण १०० टक्के भरले असून, नीरा नदीपात्रात १,६२४ क्युसेक्स वेगाने पाण्याचा विसर्ग सुरू आहे.
- वीर: ९.४१ टी.एम.सी. क्षमतेचे हे धरण १०० टक्के भरले असून, नदीपात्रात ४,६१३ क्युसेक्स, तर कालव्यात २,३०० क्युसेक्स पाण्याचा विसर्ग सुरू आहे.
- नीरा देवघर: ११.७२ टी.एम.सी. क्षमतेचे हे धरणही १०० टक्के भरले असून, नदी आणि पॉवरहाऊसमधून एकूण २,५२८ क्युसेक्स पाण्याचा विसर्ग करण्यात येत आहे.
- गुंजवणी: ३.६९ टी.एम.सी. क्षमतेचे हे धरण पूर्ण भरले असून, सध्या विसर्ग बंद आहे.
धरणे पूर्ण क्षमतेने भरल्यामुळे नीरा नदीच्या पाणीपातळीत वाढ झाली आहे. त्यामुळे नदीकाठच्या गावांना प्रशासनाकडून सतर्कतेचा इशारा देण्यात आला आहे.
