नीरा खोऱ्यातील धरणे तुडुंब; शेतकरी वर्गात आनंदाचे वातावरण

स्थैर्य, फलटण, दि. २७ ऑगस्ट : फलटण तालुक्यासह संपूर्ण नीरा खोऱ्यात यंदा झालेल्या दमदार पावसामुळे सर्व प्रमुख धरणे पूर्ण क्षमतेने भरली आहेत. नीरा प्रणालीतील भाटघर, नीरा देवघर, वीर आणि गुणवडी या चारही प्रमुख धरणांमध्ये मिळून आजमितीला ४८.३३ टी.एम.सी. म्हणजेच ९९.९२ टक्के उपयुक्त पाणीसाठा जमा झाला आहे. यामुळे या भागातील शेती आणि पिण्याच्या पाण्याचा वर्षभराचा प्रश्न मिटला असून, शेतकरी वर्गात आनंदाचे आणि समाधानाचे वातावरण आहे.

नीरा उजवा कालवा विभागाने आज प्रसिद्ध केलेल्या आकडेवारीनुसार, खोऱ्यातील भाटघर, नीरा देवघर आणि वीर ही तीन धरणे १०० टक्के भरली आहेत, तर गुणवडी धरणामध्येही ९९.८२ टक्के पाणीसाठा उपलब्ध आहे. गतवर्षीच्या तुलनेतही (९९.२५ टक्के) यंदाचा पाणीसाठा समाधानकारक आहे. धरणांच्या पाणलोट क्षेत्रात पाण्याची आवक सुरू असल्याने प्रशासनाने पाणी व्यवस्थापनास सुरुवात केली आहे.

धरणे पूर्ण क्षमतेने भरल्याने नदीपात्रात पाण्याचा विसर्ग सुरू करण्यात आला आहे. वीर धरणातून २०,०७३ क्युसेक्स वेगाने पाणी नीरा नदीत सोडण्यात येत आहे. त्यामुळे नदीकाठच्या गावांना सतर्कतेचा इशारा देण्यात आला आहे. त्याचबरोबर, नीरा उजवा कालव्यातून १,६८६ क्युसेक्स आणि नीरा डावा कालव्यातून १,०८८ क्युसेक्स पाणी शेतीसाठी सोडण्यात येत आहे.

फलटण येथील नीरा उजवा कालवा विभागाचे कार्यकारी अभियंता सं. रा. बोडाखे यांनी ही माहिती प्रसिद्धीपत्रकाद्वारे दिली आहे. मुबलक पाणीसाठ्यामुळे रब्बी हंगामातील पिकांना मोठा दिलासा मिळणार असल्याचे चित्र स्पष्ट झाले आहे.