नामस्मरणाने दैवी उर्जेशी जोडले जाते

दैनिक स्थैर्य । 5 एप्रिल 2025। फलटण । नामामध्ये मोठी ताकद आहे. नामस्मरण केल्याने मन आणि आत्मा शुद्ध होतोच पण नामस्मरण केल्याने दैवी उर्जेशी जोडले जात असल्याचे प्रतिपादन आध्यात्मिक क्षेत्रातील परमपूज्य राजनकाका देशमुख महाराज यांनी केले.

श्री स्वामी समर्थ सेवा मंडळाच्यावतीने श्री स्वामी समर्थ महाराजांचा 169 व्या प्रकट दिनाचे आयोजन नवलबाई मंगल कार्यालयात करण्यात आले होते. त्यावेळी ते बोलत होते.

प. पू. राजनकाका देशमुख महाराज यांचे उपस्थितीत विविध धार्मिक कार्यक्रमांचे आयोजन करण्यात आले होते. श्री स्वामी प्रकटदिनी श्रींचा अभिषेक, महाआरती, मंत्र , नामस्मरण त्यानंतर वास्तुशास्त्र, पितृशास्त्र, संख्याशास्त्र, शिवसरोदय शास्त्र याविषयी प. पू. राजनकाका देशमुखमहाराज यांनी माहिती सांगितली.

प. पू. राजनकाका देशमुख म्हणाले, नामस्मरण केल्याने आध्यात्मिक, मानसिक आणि शारीरिक फायदे होतात. नामस्मरण केल्याने मन शांत होते, ताण कमी होतो आणि एकाग्रता वाढते. मन आणि आत्मा शुद्ध होतो. नामस्मरण केल्याने दैवी उर्जेशी जोडले जाते. मन आणि शरीरात नवीन उत्साह आणि उल्हास येतोच पण वैयक्तिक अस्तित्वातून वैश्विक प्रकाशमान अस्तित्वात जाण्याचे महाद्वार उघडते.नामस्मरण केल्याने भक्त आणि परमात्म्यामध्ये थेट संबंध निर्माण होतो.

ध्वनीची शक्ती आणि त्याच्या नावाद्वारे देवाशी जोडले जात असल्याचे राजनकाका यांनी सांगितले. आज क्षणिक सुखापायी माणूस माणसाला विसरत चालला आहे त्यामुळे प्रेम आपुलकी राहिलेली नाही. आई वडिलांचाही त्यांना विसर पडला आहे. मात्र लक्षात ठेवा आई वडिलांची सेवा हीच खरी ईश्वरसेवा आहे.त् यांच्याशी प्रामाणिक रहा त्यांची सेवा करा त्यामुळे तुम्हाला भगवंताचे प्रेम मिळेल.

यावेळी व्यसन मुक्त संघटनेचे प्रमुख हभप धैर्यशीलभाऊ देशमुख, नवनाथमहाराज शेलार यांनी मनोगत व्यक्त केले. सायंकाळी आरती व नंतर महाप्रसाद आयोजित करण्यात आला होता. यावेळी दोन किलो चांदीचे आसन असलेली पंचधातूची श्री स्वामी समर्थांची मूर्तीचा अभिषेक करण्यात आला. ती काकांच्या निवासस्थानी कायमस्वरूपी दर्शनासाठी उपलब्ध राहणार आहे. या कार्यक्रमात मोठ्या संख्येने भाविक उपस्थित होते.