विजेच्या लपंडावाने गिरवी परिसरातील नागरिक हैराण; आंदोलनाचा इशारा
शेतकरी, उद्योजक आणि ग्राहकांना मोठा आर्थिक फटका; वीज वितरण कंपनीच्या कारभाराविरोधात तीव्र संताप
स्थैर्य, गिरवी, दि. ०६ ऑगस्ट : फलटण तालुक्याच्या पश्चिम भागातील गिरवी परिसरात गेल्या तीन महिन्यांपासून वीजपुरवठा वारंवार खंडित होत असल्याने नागरिक अक्षरशः हैराण झाले आहेत. शेतकरी, उद्योजक आणि सामान्य ग्राहक वीज वितरण कंपनीच्या या कारभाराला वैतागले असून, यावर तातडीने तोडगा न निघाल्यास तीव्र आंदोलन करण्याचा इशारा देण्यात आला आहे.
मे महिन्यापासून सुरू झालेली ही समस्या जून, जुलै आणि आता ऑगस्ट महिन्यातही कायम आहे. या समस्येचा सर्वाधिक फटका शेतकरी वर्गाला बसत आहे. वीज वितरण कंपनीने ठरवून दिलेल्या वेळापत्रकानुसारही वीजपुरवठा नियमित होत नाही. दिवसा वीजपुरवठा वारंवार खंडित होत असल्याने पिकांना पाणी देणे अशक्य झाले आहे. यामुळे शेतातील पिकांचे मोठे नुकसान होत असून, शेतकरी आर्थिक संकटात सापडला आहे.
शेतकऱ्यांप्रमाणेच उद्योजक आणि सामान्य ग्राहकांनाही कोणतीही पूर्वसूचना न देता खंडित होणाऱ्या वीजपुरवठ्याचा सामना करावा लागत आहे. यामुळे उद्योगांचे लाखो रुपयांचे नुकसान होत असून, नागरिकांमध्ये तीव्र संतापाची लाट पसरली आहे. गिरवी परिसरातील खालील गावांमध्ये ही समस्या प्रामुख्याने जाणवत आहे:
- गिरवी
- जाधववाडा
- धुमाळवाडी
- निरगुडी
- सासकल
- विंचुर्णी
- मांडवखडक
- बोडकेवाडी
गेल्या तीन महिन्यांपासून सुरू असलेल्या या विजेच्या लपंडावामुळे नागरिकांच्या मनात वीज वितरण कंपनीच्या कामकाजाविरोधात तीव्र रोष निर्माण झाला आहे. आगामी काळात वीजपुरवठा सुरळीत करण्यासाठी ठोस पावले उचलली नाहीत, तर सर्व नागरिक एकत्र येऊन आंदोलन करण्याच्या पवित्र्यात असल्याचे चित्र परिसरात दिसून येत आहे.
