फलटण तालुक्यात ७ व १४ मार्चला ‘छत्रपती शिवाजी महाराज महाराजस्व समाधान शिबीर’! महसुली प्रश्न जागेवरच सुटणार

सर्वसामान्य जनता, शेतकरी आणि महिलांचे महसूल विभागाशी संबंधित प्रश्न सोडवण्यासाठी फलटण तालुक्यात ७ आणि १४ मार्च रोजी ‘छत्रपती शिवाजी महाराज महाराजस्व समाधान शिबीर (टप्पा १)’ आयोजित करण्यात आले आहे.

स्थैर्य, फलटण, दि. २ मार्च : महाराष्ट्र शासन महसूल व वनविभाग यांच्या १८ फेब्रुवारी २०२६ रोजीच्या शासन निर्णयानुसार, फलटण तालुक्यात ‘छत्रपती शिवाजी महाराज महाराजस्व समाधान शिबीर अभियान टप्पा १’ ची प्रभावी अंमलबजावणी करण्यात येणार आहे. या अभियानांतर्गत तालुक्यातील विविध महसूल मंडळांमध्ये मंडळनिहाय समाधान शिबिरांचे आयोजन करण्यात आले आहे.

सर्वसामान्य जनता, शेतकरी, विद्यार्थी व महिला यांचे महसूल विभाग आणि इतर विभागांशी संबंधित दैनंदिन प्रश्न सोडवणे व जनतेच्या तक्रारी निकाली काढणे हा या शिबिरांचा मुख्य उद्देश आहे. महसूल प्रशासन अधिक लोकाभिमुख, कार्यक्षम व गतिमान करण्यासाठी या शिबिरांचे आयोजन करण्याचे निर्देश शासनाने दिले आहेत.

कोणकोणत्या सेवा मिळणार?

या समाधान शिबिरांमध्ये प्रामुख्याने खालील सेवा पुरविण्यात येणार आहेत:

• जिवंत ७/१२ मोहीम: यामध्ये वारस नोंद, लक्ष्मी मुक्ती, अपाक नोंदी, एकुमया नोंदी इत्यादी कामे केली जातील, तसेच ७/१२ व ८ अ चे वाटप केले जाईल.

  

• सामाजिक अर्थसहाय्य: सामाजिक अर्थसहाय्य योजनांतर्गत पात्र लाभार्थ्यांचे अर्ज भरून घेणे व त्यांना लाभ मंजूर करण्याची कार्यवाही केली जाईल.

  

शिबिरांचे वेळापत्रक व ठिकाणे: फलटण तालुक्यात दोन टप्प्यांत, म्हणजेच ७ मार्च आणि १४ मार्च रोजी खालीलप्रमाणे मंडळनिहाय शिबिरे पार पडतील :

दिनांक ७ मार्च २०२६ रोजीची शिबिरे:

• गिरवी मंडळ: ग्रामपंचायत कार्यालय, कुरवली खु.

• कोळकी मंडळ: आशीर्वाद मंगल कार्यालय, ठाकूरकी

• बरड मंडळ: नाथाचे मंदिर, राजुरी

• आसू मंडळ: खंडोबा मंदिर, साठे फाटा

• राजाळे मंडळ: मारुती मंदिर, राजाळे

दिनांक १४ मार्च २०२६ रोजीची शिबिरे:

• फलटण मंडळ: हनुमान मंदिर, चौधरवाडी

• तरडगाव मंडळ: जुनी ग्रामपंचायत चावडी, तरडगाव

• आदर्की बु. मंडळ: भैरवनाथ मंदिर, आदर्की

• होळ मंडळ: दत्त मंदिर, काळज

• वाठार नि. मंडळ: विठ्ठल रुक्मिणी मंदिर, ताथवडा

तालुक्यातील जास्तीत जास्त नागरिकांनी, शेतकऱ्यांनी आणि महिलांनी आपल्या गावाच्या नजीक आयोजित करण्यात आलेल्या या समाधान शिबिरांचा लाभ घ्यावा आणि आपले महसुली प्रश्न सोडवून घ्यावेत, असे आवाहन प्रशासनाच्या वतीने करण्यात आले आहे.