सातार्‍यात मतदार शोधताना उमेदवारांची दमछाक
स्थैर्य, सातारा, दि. 29 नोव्हेंबर : सातारा पालिकेच्या निवडणुकीची रणधुमाळी शिगेला पोहोचली असून, मतदारापर्यंत पोहोचण्यासाठी उमेदवार आणि त्यांच्या समर्थकांची धावपळ सुरू झाली आहे. या धावपळीत प्रभागाची रचना आणि मतदार याद्यातील तांत्रिक चुकांमुळे भरच पडत आहे. यामुळे मतदार शोधण्यासह त्यांच्यापर्यंत पोहोचविण्यासाठी उमेदवारांसह त्यांच्या समर्थकांना जास्तीचे श्रम घ्यावे लागत आहेत.
पालिकेच्या 25 प्रभागांतून 50 नगरसेवक मतदारांना निवडून द्यायचे आहेत. निवडणुकीची घोषणा झाल्यानंतर इतर सर्वच तांत्रिक प्रक्रिया पूर्ण झाल्यानंतर प्रभाग आणि मतदान केंद्रनिहाय याद्या उमेदवार तसेच त्यांच्या समर्थकांच्या हाती पडल्या. यानंतर त्यांच्यापर्यंत पोहोचविण्यासाठी त्यांची धावपळ सुरू झाली. प्रभाग रचना आराखडा आणि इतर तांत्रिक बाबी समजावून घेत त्यासाठीचे काम सुरू झाले.
प्रत्यक्ष कामादरम्यान अनेक ठिकाणी मोठ्या प्रमाणात तांत्रिक चुका असून, नाव, पत्ते व इतरबाबींमध्ये मोठ्या त्रुटी असल्याचेही दिसून येत आहे. या त्रुटींचा सामना दररोज सर्वच जणांना करावा लागत असल्याने त्यांचा सामना करत दिवसेंदिवस होणार्‍या त्यांच्या त्रासात वाढ होण्यास सुरुवात झाली आहे. निवडणूक यंत्रणेकडे याबाबतच्या तक्रारी, हरकती, आक्षेप नोंदवण्याची मुदत संपून गेली असल्याने सर्वच ठिकाणी बहुतांश उमेदवार आणि त्यांचे समर्थक या बाबींवर हतबल झाल्याचे दिसून येत आहे.
ज्यांना मतदार म्हणून प्रचार साहित्य दिले, ते मतदार दुसर्‍याच प्रभागात असल्याचे उमेदवार आणि त्यांच्या समर्थकांसमोर आले. याचबरोबर एकाच घरातील काही मतदार एका प्रभागात, तर काही दुसर्‍या प्रभागात विभागले असून, त्यांची विभागणी करत पुन्हा उमेदवार आणि त्यांच्या समर्थकांना पुन्हा पुन्हा प्रचार साहित्य घेऊन फिरावे लागत आहे.
