सातार्‍यातील नगराध्यक्षपदाच्या उमेदवारांची विकासकामे करण्याची ग्वाही

स्थैर्य, सातारा, दि. 29 नोव्हेंबर : सातारा शहरात वर्षानुवर्षे असलेल्या मुलभूत समस्या त्यामध्ये शहरातील वाहतूक, खड्डेमुक्त रस्ते, अनियमित घंटागाड्या याबाबत नगराध्यक्षपदाच्या उमेदवारांची एकत्र खुले चर्चासत्र बालाजी चॅरिटेबल ट्रस्टने आयोजित केले होते. या चर्चासत्रात सातारा नगरपरिषद निवडणूक 2025 मध्ये नगराध्यक्षपदासाठी निवडणूक लढवणार्‍या तब्बल 9 उमेदवारांनी चक्क 100 रुपयांच्या स्टॅम्प पेपरवर सातारा शहराच्या विकासासाठी आणि जबाबदार लोकप्रतिनिधी म्हणून काम करण्याची लेखी हमी नागरिकांना दिली आहे. ही महाराष्ट्रातील अशा प्रकारची पहिलीच घटना असून, या ’विकास करारनाम्या’मुळे लोकप्रतिनिधींची जबाबदारी आणि पारदर्शकता वाढणार आहे.

सातारा येथील श्री बालाजी चॅरिटेबल ट्रस्ट, सवयभानचे अध्यक्ष राजेंद्र मधुकर चोरगे आणि अ‍ॅड. अमित द्रविड यांच्या उपस्थितीत, उमेदवारांनी सार्वजनिकरित्या हा करारनामा केला. यात त्यांनी निवडणुकीत विजय मिळाल्यास नगराध्यक्षपदाच्या संपूर्ण कालावधीत खालील प्रमुख मुद्द्यांवर कटिबद्ध राहण्याचे वचन दिले आहे. उत्कृष्ट आणि किमान पाच वर्षे टिकेल असे काम: रस्ते, नाले, फुटपाथ आणि पाण्याच्या टाक्यांची कामे करताना निकृष्ट दर्जा टाळून ती किमान 5 वर्षे टिकतील याची हमी, जेणेकरून वारंवार नव्याने निविदा काढण्याची वेळ येणार नाही. नागरिकांच्या सहभागाने विकास: प्रत्येक प्रभागातील नागरिकांशी चर्चा करून, त्यांच्या लेखी संमतीनेच विकासाची कामे करण्याची सूचना नगरसेवकांना दिली जाईल. समस्यांचे निराकरण (कमाल 30 दिवस): नागरिकांच्या तक्रारींचे निवारण जास्तीत जास्त 30 दिवसांच्या आत केले जाईल.

पारदर्शक कारभार: केलेल्या कामांचा लेखाजोखा दरवर्षी पालिकेच्या संकेतस्थळावर प्रसिद्ध केला जाईल, तसेच उत्पन्न आणि शासन अनुदानाच्या खर्चाचे पत्रक दर सहा महिन्यांनी प्रसिद्ध केले जाईल. अनधिकृत फ्लेक्सबाजी आणि वैयक्तिक सोहळ्यांवर बंदी: नगरसेवक किंवा नातेवाईकांना वाढदिवस आणि शुभेच्छांसाठी अनधिकृत फ्लेक्स लावण्यास सक्त मनाई करण्यात येईल. तसेच, वाढदिवस कोणत्याही प्रकारे सामाजिक शांतता भंग न करता (उदा. मध्यरात्री फटाके न वाजवता) वैयक्तिकरित्या साजरे करण्याची सूचना देण्यात येईल. प्रत्यक्ष पाहणी आणि वेळेची उपलब्धता: नगराध्यक्ष म्हणून महिन्यातून एकदा प्रत्येक प्रभागात प्रत्यक्ष पाहणी करण्यात येईल आणि नागरिकांसाठी भेटायला आठवड्यात जास्तीत जास्त वेळ दिला जाईल.

नैतिक जबाबदारीची हमी: या बांधिलकीचा भंग झाल्यास नैतिकरित्या पुन्हा निवडणुकीस सामोरे जाणार नाही, अशी सार्वजनिक हमी सर्व उमेदवारांनी दिली आहे. या शपथपत्रामुळे नगराध्यक्ष पदाच्या उमेदवारांनी केवळ निवडणुकीतील आश्वासने न देता, कायद्याच्या चौकटीत (स्टॅम्प पेपरवर) आपली जबाबदारी निश्चित केली आहे. सातारा येथील नागरिकांनी उचललेले हे पाऊल महाराष्ट्रातील इतर स्थानिक स्वराज्य संस्थांसाठी एक आदर्श ठरू शकते.