ब्रेकींग न्यूज : भाजपाकडून फलटणमध्ये रामराजेंच्या पुतळ्याचे दहन
दैनिक स्थैर्य । दि. ०५ ऑक्टोबर २०२२ । फलटण । आमदार श्रीमंत रामराजे नाईक निंबाळकर विरुद्ध आमदार जयकुमार गोरे यांच्यातील संघर्ष शिघेला पोचत असताना खुद्द फलटणमध्येच भाजपच्या कार्यकर्त्यांकडून आ.श्रीमंत रामराजेंच्या पुतळ्याचे दहन चौकाचौकात करण्यात आले.
म्हसवडच्या एमआयडीसीवरुन गेल्या काही दिवसांपासून भाजपचे जिल्हाध्यक्ष आ.जयकुमार गोरे व आ.श्रीमंत रामराजे नाईक निंबाळकर यांच्याकडून एकमेकांविरुद्ध टिका होताना दिसत आहेत. त्यातच भर म्हणून गेल्या दोन दिवसांपूर्वी श्रीमंत रामराजे राष्ट्रवादीच्या मेळाव्यासाठी माण तालुक्यात गेले होते. त्यावेळी आमदार गोरे यांच्या कार्यकर्त्यांनी श्रीमंत रामराजेंचा पुतळा जाळून त्यांच्या ताफ्याला काळे झेंडे दाखवले होते. त्यानंतर या कृतीला प्रतिउत्तर म्हणून फलटणला राजे गटाच्या कार्यकर्त्यांनी आमदार गोरेंच्या पुतळ्याचे दहन केले होते. शिवाय आ.श्रीमंत रामराजे यांनी फलटण येथील राष्ट्रवादीच्या मेळाव्यात आमदार जयकुमार गोरे व खासदार रणजितसिंह नाईक निंबाळकर यांच्यावर जोरदार टिका केली होती.
आता आज चक्क फलटण शहरात आ.श्रीमंत रामराजेंच्या पुतळ्याचे दहन भाजप कार्यकर्त्यांकडून करण्यात आले.
भारतीय जनता पार्टीचे जिल्हाध्यक्ष आमदार जयकुमार गोरे यांचा पुतळा काही दिवसापूर्वी फलटण मध्ये जाळण्यात आलेला होता. भाषण करायला व विचार मांडण्याचे स्वातंत्र्य प्रत्येकामध्ये आहे. परंतु आमचे नेते जयकुमार गोरे यांचा पुतळा फलटणमध्ये जाळल्याने आज दसऱ्याच्या मुहूर्तावर फलटण तालुक्यातील रावणाचे दहन आम्ही करत आहोत, असे मत भारतीय जनता पार्टीचे फलटण तालुकाध्यक्ष बजरंग गावडे यांनी यावेळी स्पष्ट केले.
भारतीय जनता पार्टीचे जिल्हाध्यक्ष आमदार जयकुमार गोरे यांच्या पुतळ्याचे जे फलटणमध्ये दहन करण्यात आले. ते माजी सभापती श्रीमंत रामराजे नाईक निंबाळकर यांच्या आदेशानेच करण्यात आले. याबाबत फलटण तालुका भारतीय जनता पार्टीच्या वतीने निषेध व्यक्त आम्ही सर्वजण करत आहोत, असे मत भारतीय जनता पार्टीचे फलटण शहराध्यक्ष अमोल सस्ते यांनी यावेळी व्यक्त केले.
भारतीय जनता पार्टीच्या उपस्थित पदाधिकारी व कार्यकर्त्यांनी भारतीय जनता पार्टीचा विजय असो व रामराजे मुर्दाबाद अशा घोषणा त्यांच्या वतीने देण्यात आल्या.
