सुरवडी गणात भाजपचे जोरदार शक्तिप्रदर्शन; धनंजय (दादा) साळुंखे-पाटील यांचा उमेदवारी अर्ज दाखल! विकासाच्या मुद्द्यावर लढणार निवडणूक

सुरवडी पंचायत समिती गणातून भाजपचे अधिकृत उमेदवार धनंजय (दादा) साळुंखे-पाटील यांनी आज शक्तिप्रदर्शन करत उमेदवारी अर्ज दाखल केला. वाठार-निंबाळकर गटाचे उमेदवार विष्णुपंत लोखंडे व गणाचे उमेदवार सौ. शिवांगी शिंदे यांची प्रमुख उपस्थिती. वाचा सविस्तर…

स्थैर्य, फलटण, दि. 22 जानेवारी : आगामी पंचायत समिती निवडणुकीच्या रणधुमाळीत भारतीय जनता पक्षाने सुरवडी गणात जोरदार आघाडी घेतली आहे. भाजपचे अधिकृत उमेदवार आणि जनसामान्यांचे नेते श्री. धनंजय (दादा) साळुंखे-पाटील (Dhananjay Salunkhe Patil) यांनी आज फलटण तहसील कार्यालयात मोठ्या उत्साहात आणि अभूतपूर्व शक्तिप्रदर्शन करत आपला उमेदवारी अर्ज दाखल केला. यावेळी महायुतीचे पदाधिकारी आणि कार्यकर्त्यांच्या घोषणाबाजीने परिसर दणाणून गेला होता.

दिग्गजांची उपस्थिती; महायुतीत एकजूट

उमेदवारी अर्ज भरताना धनंजय दादांच्या सोबत वाठार-निंबाळकर जिल्हा परिषद गटाचे उमेदवार श्री. विष्णुपंत लोखंडे (Vishnupant Lokhande) आणि वाठार-निंबाळकर गणाच्या उमेदवार सौ. शिवांगी तुकाराम शिंदे (Shivangi Tukaram Shinde) हे देखील प्रामुख्याने उपस्थित होते. या तिन्ही उमेदवारांच्या उपस्थितीमुळे या भागात महायुतीची भक्कम एकजूट दिसून आली. यावेळी आजी-माजी लोकप्रतिनिधी, पक्षाचे पदाधिकारी आणि सुरवडी परिसरातील नागरिक मोठ्या संख्येने उपस्थित होते.

विकासाच्या जोरावर मतांचा जोगवा

गेल्या अनेक वर्षांपासून धनंजय साळुंखे-पाटील यांनी सुरवडी आणि परिसरात कोणतेही पद नसताना सातत्याने लोकाभिमुख कार्य केले आहे. रस्ते, पाणीपुरवठा, शिक्षण, आरोग्य आणि सामाजिक प्रश्नांवर त्यांनी दिलेला लढा आणि केलेले भरीव काम, यामुळे त्यांची या भागात मोठी ताकद निर्माण झाली आहे. त्यांच्या या कार्याची दखल घेत आणि लोकांमधील वाढता विश्वास पाहता पक्षाने त्यांना अधिकृत उमेदवारी दिली आहे.

“विकास हाच ध्यास…”

अर्ज दाखल केल्यानंतर प्रतिक्रिया देताना श्री. धनंजय साळुंखे-पाटील म्हणाले, “सुरवडी पंचायत गणाचा सर्वांगीण विकास हाच आमचा एकमेव ध्यास आहे. सर्वसामान्यांच्या हितासाठी पारदर्शक आणि गतिमान प्रशासन देण्याचा माझा निर्धार असून, जनता विकासाच्या पाठीशी नक्कीच उभी राहील.”

सुरवडी गणात भाजप आणि महायुतीचा विजय निश्चित असून, या निवडणुकीने विकासाच्या नव्या पर्वाची सुरुवात होईल, असा विश्वास उपस्थित कार्यकर्त्यांनी व्यक्त केला.