सस्तेवाडी: बाळासाहेब ठोंबरेंचा भाजप प्रवेश; रणजितसिंहांची ताकद वाढली
सस्तेवाडी गणाचे माजी पंचायत समिती सदस्य बाळासाहेब ठोंबरे यांनी समर्थकांसह भाजपमध्ये प्रवेश केला. यामुळे आगामी निवडणुकांपूर्वी खासदार गटाची ताकद वाढली आहे.
स्थैर्य, फलटण, दि. ०२ जानेवारी : आगामी जिल्हा परिषद आणि पंचायत समिती निवडणुकांच्या पार्श्वभूमीवर फलटण तालुक्यातील राजकीय समीकरणे वेगाने बदलत आहेत. सस्तेवाडी गणाचे पंचायत समितीचे माजी सदस्य बाळासाहेब ठोंबरे यांनी आपल्या प्रमुख समर्थकांसह भारतीय जनता पक्षात जाहीर प्रवेश केला आहे. माढा लोकसभा मतदारसंघाचे माजी खासदार रणजितसिंह नाईक निंबाळकर यांच्या उपस्थितीत हा पक्षप्रवेश सोहळा पार पडला.
या पक्षप्रवेश सोहळ्याला माजी खासदार रणजितसिंह नाईक निंबाळकर आणि ज्येष्ठ नेते प्रल्हाद साळुंखे-पाटील यांची प्रमुख उपस्थिती होती. यावेळी बाळासाहेब ठोंबरे आणि त्यांच्या सहकाऱ्यांचे पक्षात स्वागत करण्यात आले. ठोंबरे यांच्या प्रवेशामुळे सस्तेवाडी गणात भाजपची बाजू भक्कम झाली असल्याचे बोलले जात आहे.
बाळासाहेब ठोंबरे यांच्यासह सस्तेवाडी ग्रामपंचायतीच्या विद्यमान सदस्यांनीही भाजपचा झेंडा हाती घेतला आहे. यामध्ये ग्रामपंचायत सदस्या सौ. रेखा ठोंबरे, सौ. मानिनी विजय पानसरे आणि संजय जाधव यांचा समावेश आहे. तसेच सस्तेवाडी गणातील सर्व प्रमुख कार्यकर्ते आणि पदाधिकाऱ्यांनी यावेळी भाजपमध्ये प्रवेश केला.
