कोळकी गट खुला होताच राजे गटात हालचाली; श्रीमंत संजीवराजेंनाच उमेदवारी देण्याची मागणी
स्थैर्य, फलटण, दि. १५ ऑक्टोबर : सातारा जिल्हा परिषदेच्या आगामी निवडणुकीसाठी कोळकी गटाचे आरक्षण सर्वसाधारण (खुले) झाल्याने, राजे गटाकडून माजी जिल्हा परिषद अध्यक्ष श्रीमंत संजीवराजे नाईक निंबाळकर यांना उमेदवारी देण्यात यावी, अशी जोरदार मागणी कार्यकर्त्यांकडून जोर धरू लागली आहे. यामुळे गटातील राजकीय वातावरण तापले आहे.
आगामी जिल्हा परिषद निवडणुकीसाठी नुकतीच आरक्षण सोडत जाहीर झाली, ज्यामध्ये कोळकी गटाचे आरक्षण खुले झाले. त्यामुळे या गटातून निवडणूक लढवण्यासाठी अनेकजण इच्छुक असले तरी, राजे गटाच्या कार्यकर्त्यांनी संजीवराजे नाईक निंबाळकर यांच्या नावासाठी आग्रह धरल्याने राजकीय चुरस वाढली आहे.
संजीवराजे नाईक निंबाळकर यांनी गेल्या ३० वर्षांपासून फलटण तालुक्यातील विविध गटांमधून जिल्हा परिषदेचे सदस्यपद भूषवले आहे. या काळात त्यांनी जिल्हा परिषदेचे अध्यक्षपदही सांभाळले असून, तालुक्याच्या राजकारणावर त्यांचे मोठे वर्चस्व राहिले आहे. त्यांच्या अनुभवाचा फायदा पुन्हा एकदा गटाला मिळावा, अशी कार्यकर्त्यांची भावना आहे.
कोळकी गटातील बहुसंख्य कार्यकर्त्यांनी आणि पदाधिकाऱ्यांनी राजे गटाच्या वरिष्ठ नेतृत्वाकडे श्रीमंत संजीवराजे यांच्या उमेदवारीसाठी विनंती केली आहे. निरगुडी ग्रामपंचायतीचे सदस्य सत्यजित सस्ते यांनीही या मागणीला दुजोरा दिला असून, जनतेतूनच संजीवराजे यांच्या नावासाठी आग्रह होत असल्याचे सांगितले.
श्रीमंत संजीवराजे यांनी उमेदवारी स्वीकारल्यास तालुक्यातील ही निवडणूक अत्यंत प्रतिष्ठेची होईल, असे मानले जात आहे. गेल्या अनेक वर्षांपासून तालुक्यावर असलेले वर्चस्व कायम राखण्यासाठी राजे गटाचे कार्यकर्ते पूर्ण ताकदीने निवडणुकीच्या मैदानात उतरण्यास सज्ज झाले आहेत.
कार्यकर्त्यांची मागणी आणि जनभावना लक्षात घेता राजे गटाचे नेतृत्व काय निर्णय घेते, याकडे सर्वांचे लक्ष लागले आहे. उमेदवारीची अधिकृत घोषणा अद्याप झाली नसली तरी, श्रीमंत संजीवराजे यांच्या नावाची चर्चा सुरू झाल्याने कोळकी गटातील राजकीय हालचालींना वेग आला आहे.
