उमेदवारी नाकारल्याने आरिफ पटेलांचा राजे गटाला रामराम; अर्ज भरण्यापासून रोखण्यासाठी राजे गटाने डांबून ठेवले : आरिफ पटेल

• फलटण पालिकेच्या प्रभाग क्र. १३ मध्ये आरिफ पटेलांची बंडखोरी

• उमेदवारी डावलल्याने आणि अपक्ष अर्ज भरण्यापासून रोखल्याने घेतला निर्णय

• आमदार सचिन पाटील यांच्या उपस्थितीत राष्ट्रवादीत प्रवेश

स्थैर्य, फलटण, दि. २१ नोव्हेंबर : फलटण नगरपरिषद निवडणुकीच्या धामधुमीत राजे गटाला (रामराजे नाईक निंबाळकर गट) गळती लागली आहे. पद्मावती नगरमधील राजे गटाचे २५ वर्षांपासूनचे निष्ठावंत कार्यकर्ते आरिफ बाबासाहेब पटेल यांनी पक्षाला रामराम ठोकत राष्ट्रवादी काँग्रेस पार्टीमध्ये (अजित पवार गट) प्रवेश केला आहे. आमदार सचिन पाटील आणि तालुकाध्यक्ष श्रीमंत शिवरूपराजे खर्डेकर यांच्या नेतृत्वाखाली आणि भाजप नेते माजी खासदार रणजितसिंह नाईक निंबाळकर यांच्या प्रमुख उपस्थितीत हा प्रवेश सोहळा पार पडला.

२५ वर्षांच्या निष्ठेचे फळ मिळाले नाही

प्रवेशानंतर आपली भूमिका मांडताना आरिफ पटेल यांनी राजे गटावर गंभीर आरोप केले. ते म्हणाले, “मी गेल्या २० ते २५ वर्षांपासून राजे गटासोबत एकनिष्ठ राहून काम करत आहे. माझ्या पत्नीसाठी प्रभाग क्रमांक १३ मधून (ओबीसी महिला राखीव) मी उमेदवारी मागितली होती. गेल्या तीन टर्मपासून मला ‘पुढच्या वेळी संधी देऊ’ असे सांगून थांबवण्यात आले. यावेळीही शेवटपर्यंत शब्द दिला, पण ऐनवेळी माझी फसवणूक केली.”

‘माझा घटनात्मक अधिकार हिरावला’

राजे गटाच्या स्थानिक नेतृत्वावर संताप व्यक्त करताना पटेल यांनी धक्कादायक खुलासा केला. ते म्हणाले, “मला तिकीट तर दिले नाहीच, पण मला अपक्ष उमेदवारी अर्ज भरू नये म्हणून माझे एबी फॉर्म घेण्याचे किंवा अपक्ष लढण्याचे अधिकारही काढून घेण्यात आले. मला अर्ज भरण्यापासून रोखण्यासाठी एका ठिकाणी बसवून ठेवण्यात आले. माझा उमेदवारी अर्ज भरण्याचा घटनात्मक अधिकार हिरावून घेण्यात आला, त्यामुळेच मी हा निर्णय घेतला आहे.”

युतीची ताकद वाढली आरिफ पटेल यांच्या प्रवेशामुळे प्रभाग क्रमांक १३ आणि पद्मावती नगर परिसरात महायुतीची (भाजपा-राष्ट्रवादी) ताकद वाढली आहे. यावेळी आमदार सचिन पाटील, माजी खासदार रणजितसिंह नाईक निंबाळकर आणि शिवरूपराजे खर्डेकर यांनी आरिफ पटेल यांचे पक्षात स्वागत केले.