नीरा प्रणालीतील सर्व प्रमुख धरणे १००% भरली; नदीपात्रात ४८,८८३ क्युसेक्स विसर्ग सुरू, सतर्कतेचा इशारा कायम

स्थैर्य, फलटण, दि. १९ ऑगस्ट : फलटण तालुक्यासह पुणे आणि सोलापूर जिल्ह्यासाठी जीवनदायिनी ठरणाऱ्या नीरा प्रणालीतील सर्व चार प्रमुख धरणे १००% भरली आहेत. पाणलोट क्षेत्रात झालेल्या दमदार पावसामुळे भाटघर, वीर, नीरा देवघर आणि गुंजवणी या धरणांमध्ये मिळून ४८.५८ टीएमसी क्षमतेचा पूर्ण पाणीसाठा झाला आहे. यामुळे शेतकरी वर्गात आनंदाचे वातावरण असले तरी, नदीपात्रातील मोठ्या विसर्गामुळे नदीकाठच्या गावांना दिलेला सतर्कतेचा इशारा कायम ठेवण्यात आला आहे.

नीरा उजवा कालवा विभाग, फलटण यांच्याकडून मिळालेल्या माहितीनुसार, सर्व धरणे पूर्ण क्षमतेने भरल्याने नदीपात्रात पाण्याचा विसर्ग सुरू ठेवण्यात आला आहे. सध्या नीरा नदीमध्ये एकूण ४८,८८३ क्युसेक्स वेगाने पाणी सोडण्यात येत आहे. यामध्ये प्रामुख्याने वीर धरणातून ३३,६९३ क्युसेक्स, भाटघर धरणातून १०,५०० क्युसेक्स आणि नीरा देवघर धरणातून ६,८०० क्युसेक्स पाण्याचा समावेश आहे.

पाण्याचा विसर्ग मोठा असल्याने नीरा नदीच्या पाणी पातळीत वाढ झाली आहे. प्रशासनाने नदीच्या दोन्ही किनाऱ्यांवरील नागरिकांना सावधानता बाळगण्याचे आणि नदीपात्राजवळ न जाण्याचे आवाहन केले आहे. आपली जनावरे व शेतीची अवजारे सुरक्षित ठिकाणी हलवण्याच्या सूचनाही देण्यात आल्या आहेत.

दरम्यान, धरणे भरल्याने शेतीसाठी कालव्यांनाही पाणी सोडण्यात आले आहे. फलटण तालुक्याला सिंचनासाठी अत्यंत महत्त्वाच्या असलेल्या नीरा उजवा कालव्यातून १,२९९ क्युसेक्सने पाणी सोडण्यात येत आहे. यामुळे तालुक्यातील शेतीपिकांना मोठा फायदा होणार असून, शेतकऱ्यांनी समाधान व्यक्त केले आहे.