कोळकीच्या रणांगणात सौ. जिजामाला वहिनी मैदानात?
सातारा जिल्हा परिषदेच्या कोळकी गटामधून ॲड. सौ. जिजामाला नाईक निंबाळकर निवडणूक लढवण्याची दाट शक्यता. निवडणूक न लढवण्याचा निर्णय बदलणार? कार्यकर्त्यांच्या प्रचंड दबावामुळे राजकीय वर्तुळात खळबळ. वाचा सविस्तर…
स्थैर्य, फलटण, दि. २० जानेवारी : सातारा जिल्हा परिषद निवडणुकीच्या रणधुमाळीत फलटण तालुक्यातील ‘कोळकी’ जिल्हा परिषद गट (Kolki ZP Group) सध्या सर्वाधिक चर्चेत आला आहे. या प्रतिष्ठेच्या लढतीत भारतीय जनता पार्टीचे नेते आणि माजी खासदार रणजितसिंह नाईक निंबाळकर यांच्या पत्नी, माजी जिल्हा परिषद सदस्या ॲड. सौ. जिजामाला रणजितसिंह नाईक निंबाळकर (Adv. Jijamala Naik Nimbalkar) या स्वतः रिंगणात उतरण्याची दाट शक्यता निर्माण झाली आहे. वास्तविक त्यांनी निवडणूक न लढवण्याचा निर्णय घेतला होता, परंतु कार्यकर्त्यांच्या प्रचंड दबावाखाली त्या आपला निर्णय बदलण्याच्या तयारीत असल्याची जोरदार चर्चा राजकीय वर्तुळात सुरू आहे.
कार्यकर्त्यांचा रेट्यामुळे निर्णय बदलणार?
कोळकी गट हा फलटणच्या राजकारणाचे केंद्रबिंदू मानला जातो. या गटातून विजय मिळवणे रणजितसिंह नाईक निंबाळकर यांच्या गटासाठी अत्यंत प्रतिष्ठेचे आहे. सूत्रांनी दिलेल्या माहितीनुसार, ॲड. जिजामाला नाईक निंबाळकर यांनी वैयक्तिकरित्या यावर्षी जिल्हा परिषद किंवा इतर कोणतीही निवडणूक न लढवण्याचा निर्णय घेतला होता. मात्र, कोळकी गटातील समीकरणे पाहता, येथे ‘वहिनीं’नीच नेतृत्व करावे, असा प्रचंड आग्रह आणि दबाव स्थानिक कार्यकर्ते आणि पदाधिकाऱ्यांकडून होत आहे. कार्यकर्त्यांच्या या प्रेमापोटी आणि राजकीय निकड पाहता त्या पुन्हा एकदा निवडणुकीच्या रणांगणात उतरण्याची शक्यता बळावली आहे.
अनुभवी नेतृत्व आणि विकासाचा चेहरा
सौ. जिजामाला नाईक निंबाळकर या केवळ माजी खासदारांच्या पत्नी नाहीत, तर त्या स्वतः एक अभ्यासू आणि महिला नेत्या म्हणून ओळखल्या जातात. त्यांनी यापूर्वी जिल्हा परिषदेचे आणि जिल्हा नियोजन समितीचे (District Planning Committee) सदस्य म्हणून अत्यंत प्रभावी काम केले आहे. त्यांचा दांडगा जनसंपर्क आणि प्रशासनावरील पकड पाहता, त्या कोळकीतून सर्वोत्कृष्ट उमेदवार ठरू शकतात, असे कार्यकर्त्यांचे म्हणणे आहे.
कोळकीत होणार ‘हायव्होल्टेज’ ड्रामा!
जर जिजामाला नाईक निंबाळकर यांनी उमेदवारी अर्ज दाखल केला, तर कोळकी गटातील लढत ही ‘काटे की टक्कर’ होणार आहे. समोर राजे गटाकडूनही तगडा उमेदवार असण्याची शक्यता असल्याने, ही लढत संपूर्ण जिल्ह्याचे लक्ष वेधून घेणारी ठरेल.
