आळजापूर गावात महिलांच्या आक्रमक पवित्र्यामुळे दारू विक्री बंद करण्याचा निर्णय
दैनिक स्थैर्य | दि. 12 जानेवारी 2025 | आळजापूर | आळजापूर गावातील महिलांनी दारू विक्रीला विरोध करण्यासाठी घेतलेल्या आक्रमक पवित्र्याचा परिणाम आज दिसून आला. निवडणूक आयोगाच्या मार्गदर्शनाखाली आयोजित केलेल्या मतदान प्रक्रियेत महिलांनी दारू विक्री बंद करण्याचा स्पष्ट निर्णय दिला आहे. या मतदान प्रक्रियेत आळजापूर गावातील एकूण 723 महिला मतदारांपैकी 480 महिलांनी मतदान केले, ज्यात मद्यविक्री अनुज्ञप्ती बंद करण्याच्या पक्षात 454 मते मिळाली.
फलटण तहसीलदार डॉ. अभिजीत जाधव यांनी दिलेल्या माहितीनुसार, आळजापूर गावातील महिलांनी दारू विक्रीला विरोध करण्यासाठी आंदोलन केले होते. या आंदोलनाच्या पार्श्वभूमीवर, प्रशासनाने बॅलेट पेपरवर मतदान प्रक्रिया आयोजित केली. या मतदानात मद्यविक्री अनुज्ञप्ती चालू ठेवावी या विरोधात 454 मते मिळाली, तर अनुकूल 19 मते मिळाली. अवैध मते 07 होते.
मतदान प्रक्रिया पूर्ण झाल्यानंतर, फलटण तहसीलदार डॉ. अभिजीत जाधव यांनी अंतिम निकाल सातारा जिल्हाधिकारी गृह शाखा, उपविभागीय अधिकारी फलटण, गटविकास अधिकारी फलटण पंचायत समिती, राज्य उत्पादन शुल्क फलटण आणि आळजापूर ग्रामपंचायत यांच्याकडे पाठविला आहे. या निकालानुसार आळजापूर गावामध्ये दारू विक्री बंद करण्याचा आदेश लवकरच येणार आहे.
या संपूर्ण प्रक्रियेमध्ये निवडणूक पर्यवेक्षण अधिकारी तथा निवासी नायब तहसीलदार अभिजीत सोनवणे, निवडणूक पर्यवेक्षण अधिकारी यांचे सहाय्यक तथा तलाठी लक्ष्मण अहिवळे आणि विविध शासकीय कर्मचाऱ्यांनी सक्रिय भाग घेतला.
आळजापूर गावातील महिलांच्या एकजुटीने आणि आक्रमक पवित्र्यामुळे दारू विक्री बंद करण्याचा निर्णय घेतला गेला आहे. हा निर्णय गावातील सामाजिक आणि सांस्कृतिक परिवर्तनाचा एक महत्त्वाचा टप्पा मानला जाईल. या निर्णयामुळे गावातील महिला सशक्तीकरण आणि समाजातील दारूविरोधी चळवळीला बळ मिळेल.
सरपंच शुभम नलवडे यांच्या दारुबंदीला कणखर विरोध
आळजापूर ग्रामपंचायतीचे सरपंच शुभम नलवडे यांनी गावाच्या हद्दीमध्ये दारू विक्री होऊ नये यासाठी पहिल्यापासून आक्रमक पवित्रा घेतला होता. त्यांच्या आक्रमक पवित्र्यामुळे गावातील महिलांना सुद्धा आगामी पिढी हि दारूच्या आहारी जाऊ नये यासाठी विशेष जनजागृती सरपंच शुभम नलवडे यांनी केली होती. त्याचे यश त्यांना मिळाले होते. दारूबंदीच्या विषयात तालुक्यासह जिल्ह्यातील दिग्गज नेतेमंडळींच्या मर्जी न मिळवता गावातील तरुणांच्यासाठी दारुबंदी आवश्यक असल्याने आडवी बाटलीसाठी त्यांनी विशेष प्रयत्न केले असल्याचे दिसून आले.
