लग्नाच्या आमिषाने महिलेवर अत्याचार केल्याप्रकरणी एकास अटक
दैनिक स्थैर्य | दि. १७ ऑगस्ट २०२३ | फलटण |
नाईकबोंबवाडी (ता. फलटण) येथील शिजवल सिटी व टेंभुर्णी (जि. सोलापूर) येथे लग्नाचे व जमीन नावावर करतो, असे सांगून एका महिलेवर वारंवार अत्याचार केल्या प्रकरणी संशयित आरोपी शिवाजी सुभाष गोळे (रा. चिखलठाण नं. १, ता. करमाळा, जि. सोलापूर) यास फलटण ग्रामीण पोलिसांनी अटक केली आहे. या प्रकरणी पीडित महिलेने स्वत: पोलिसात तक्रार दिली असून आरोपीस चार दिवसांची पोलीस कोठडी देण्यात आली आहे.
या घटनेची अधिक माहिती अशी, दि. १० जून २०२२ ते १० जून २०२३ या कालावधीत नाईकबोंबवाडी (ता. फलटण) येथील शिजवल सिटी व टेंभुर्णी (जि. सोलापूर) येथे शिवाजी सुभाष गोळे (रा. चिखलठाण नं. १, ता. करमाळा) याने पीडितेचा नवरा दारूचा व्यसनी आहे हे माहिती असल्याने आरोपीने महिलेला नवर्‍यापासून घटस्फोट घे, तुझ्यासोबत लग्न करतो व माझी जमीन तुझ्या नावावर करतो, असे आमिष दाखवून तिचा विश्वास संपादन करून शिवाजी गोळे याने महिलेवर अनेकवेळा अत्याचार केले. तसेच तिच्या मोबाईल व्हॉटसअ‍ॅपवर अश्लील व्हिडीओ पाठवला. पुढे पीडित महिलेस विविध कारणांवरून त्रास देवून तिला व तिच्या मुलीला मारण्याची धमकी देवू लागला. तसेच तिच्या गळ्यातील मंगळसूत्र, कानातील झुमके व हातातील दोन अंगठया असे सोन्याचे दागिने काढून घेतले, अशी तक्रार महिलेने पोलिसात दिली आहे.
या प्रकरणी पोलिसांनी संशयित आरोपी शिवाजी सुभाष गोळे (रा. चिखलठाण नं. १, ता. करमाळा, जि. सोलापूर) यास पाळत ठेवून त्याच्या गावी अटक केली असून त्यास चार दिवसांची पोलीस कोठडी देण्यात आली आहे.
ही कारवाई पोलीस अधीक्षक समीर शेख, अप्पर पोलीस अधीक्षक बापू बांगर, उपविभागीय पोलीस अधिक्षक राहुल धस यांच्या मार्गदर्शनाखाली पोलीस निरीक्षक सुनील महाडिक, सहाय्यक पोलीस निरीक्षक नवनाथ रानगट, पोलीस हवलदर माने, पोलीस शिपाई इंगळे यांनी केली.
अधिक तपास सपोनि रानगट करत आहेत.
