महिलांच्या कलागुणांना वाव देण्यासाठी माऊली फाउंडेशनचा स्तुत्य उपक्रम; मॅट रांगोळी वर्गात सहभागी होण्याचे कु. सिद्धाली शहांचे आवाहन
माऊली फाउंडेशन व नगरसेविका सिद्धाली शहा यांच्या पुढाकाराने फलटणमध्ये महिलांसाठी १ ते ३ ऑक्टोबरदरम्यान विशेष मॅट रांगोळी वर्गाचे आयोजन करण्यात आले आहे.
स्थैर्य, फलटण, दि. ३० सप्टेंबर : फलटण येथील महिलांच्या कलागुणांना प्रोत्साहन देण्यासाठी आणि त्यांना रंगांच्या माध्यमातून सृजनशीलतेचा आनंद घेता यावा, या उद्देशाने ‘माऊली फाउंडेशन’च्या वतीने महिलांसाठी विशेष ‘मॅट रांगोळी’ वर्गाचे आयोजन करण्यात आले आहे. फलटण नगरपरिषदेच्या नगरसेविका कु. सिद्धाली अनुप शहा यांच्या पुढाकाराने हा अभिनव उपक्रम राबवण्यात येत आहे.
१ ते ३ ऑक्टोबर दरम्यान वर्गाचे आयोजन:
या मॅट रांगोळी वर्गाचे आयोजन येत्या १, २ आणि ३ ऑक्टोबर (गुरुवार, शुक्रवार आणि शनिवार) रोजी करण्यात आले आहे. महिलांना वेळेचे नियोजन करणे सोयीचे व्हावे, यासाठी या वर्गाची वेळ दुपारी २ ते ५ अशी निश्चित करण्यात आली आहे. विशेष बाब म्हणजे, रांगोळीसाठी लागणारे सर्व आवश्यक साहित्य माऊली फाउंडेशनतर्फेच पुरवले जाणार आहे.
कलेला नवी दिशा देण्याची संधी:
महिला सक्षमीकरण, आरोग्य, समाजकल्याण आणि शाश्वत विकास या प्रमुख ध्येयांवर माऊली फाउंडेशन कार्यरत आहे. रंगांच्या उधळणीतून आनंद, सृजन आणि आपलेपणाची नाती गुंफण्याच्या उद्देशाने हा उपक्रम आयोजित करण्यात आला आहे.
तरी आपल्या अंगभूत कलेला नवी दिशा देण्यासाठी शहरातील जास्तीत जास्त महिलांनी या मॅट रांगोळी वर्गात सहभाग नोंदवावा, असे मनःपूर्वक आवाहन फलटण नगरपरिषदेच्या नगरसेविका कु. सिद्धाली अनुप शहा यांनी केले आहे.
