‘प्रोग्रेसिव्ह’मध्ये ७६ वा प्रजासत्ताक दिन उत्साहात साजरा

दैनिक स्थैर्य | दि. २९ जानेवारी २०२५ | फलटण |
सरस्वती शिक्षण संस्था संचलित, प्रोग्रेसिव्ह कॉन्व्हेंट स्कूल अँड ज्युनिअर कॉलेज, कोळकी (फलटण) या शाळेत ७६ वा भारतीय प्रजासत्ताक दिन उत्साहात साजरा करण्यात आला.

या कार्यक्रमास प्रमुख पाहुणे म्हणून कृष्णामाई फौंडेशन व निकोप हॉस्पिटलचे संस्थापक प्रसिद्ध हृदयरोगतज्ज्ञ डॉ. जे. टी. पोळ, सरस्वती शिक्षण संस्थेचे संस्थापक अध्यक्ष भीमराव माने, लायन्स क्लब फलटणचे अध्यक्ष जगदिश करवा, सुहास निकम, ग्रामपंचायत सदस्य शिवाजी भुजबळ, रमेश नाळे, युवाजनमत संपादक युवराज पवार, सरस्वती शिक्षण संस्थेच्या व्यवस्थापकीय संचालिका सौ. संध्या गायकवाड, सौ. उज्ज्वला निंबाळकर, योगा प्रशिक्षिका सौ.विद्या शिंदे आणि मनिषा कांगणी, प्राचार्य अमित सस्ते, पर्यवेक्षक महेंद्र कातुरे, समन्वयिका सौ. सुजाता गायकवाड, सौ. माधुरी काटकर, सौ. अहिल्या कवितके यांच्यासह सर्व विद्यार्थी, पालक आणि शिक्षक उपस्थित होते.

प्रारंभी प्रमुख पाहुणे आणि मान्यवरांचे विद्यार्थ्यांनी स्वागत केले. त्यानंतर डॉ.जे. टी. पोळ यांच्या हस्ते ध्वजारोहण झाले. विद्यार्थिनींनी राष्ट्रगीत व ध्वजगीत म्हणत राष्ट्रध्वजास सलामी दिली.

प्रमुख पाहुणे, शिक्षक, विद्यार्थी व पालक यांनी भारतीय संविधानाच्या उद्देशिकेचे सामूहिक वाचन केले. माध्यमिकच्या विद्यार्थ्यांनी परेडद्वारे मानवंदना दिली. यानंतर प्रजासत्ताक दिनाचे महत्त्व इयत्ता सहावीतील विद्यार्थिनी सई पवार हिने सांगितले. माध्यमिक विभागाच्या विद्यार्थिनींनी मेरी मिट्टी मेरी शान, तर प्राथमिकच्या विद्यार्थिनींनी शक्ती समृद्धतम मुक्ती समृद्तम् या देशभक्तीपर गीतांद्वारे राष्ट्रप्रेमाचे दर्शन घडविले.

एल.के.जी. व यु.के.जी. आणि प्राथमिकच्या विद्यार्थ्यांनी महापुरुष तसेच स्वातंत्र्यवीर यांच्यावर उत्तम भाषणे व त्यांची घोषवाक्ये सादर करून त्यांचे स्वातंत्र्य संग्रामातील योगदान सांगितले. पूर्वप्राथमिकच्या विद्यार्थ्यांनी बालनाटिकेद्वारे पर्यावरण वाचवा, प्रदूषण टाळा, सकस आहार इ. विषयी महत्त्वपूर्ण संदेश दिला. सबका साथ, सबका विकास या नाटिकेद्वारे इयत्ता अकरावी-बारावीच्या विद्यार्थिनींनी भारत देशातील विविध क्षेत्रातील होत असलेला विकास मांडला. देशभक्तीपर गीतांवर प्राथमिकच्या विद्यार्थ्यांनी लेझीम तर माध्यमिकच्या विद्यार्थ्यांनी नृत्य सादरीकरण उत्कृष्टपणे केले.

डॉ. जी. टी. पोळ यांनी मनोगत व्यक्त करताना विद्यार्थ्यांच्या आत्मविश्वास आणि गुणवत्तेचे विशेष कौतुक करून संस्थेला शुभेच्छा दिल्या व सर्वतोपरी सहकार्य करण्याचे आश्वासन दिले. तसेच विद्यार्थी व पालकांना आरोग्याविषयी मार्गदर्शन केले.

सरस्वती शिक्षण संस्थेच्या व्यवस्थापकीय संचालिका सौ. संध्या गायकवाड यांनी प्रजासत्ताक दिनाचे महत्त्व सांगून थोर राष्ट्रपुरुषांच्या आठवणींना उजाळा दिला.

प्रोग्रेसिव्ह कॉन्व्हेंट स्कूल अँड ज्युनिअर कॉलेजच्या पूर्वप्राथमिक, प्राथमिक व माध्यमिकच्या विद्यार्थ्यांनी काढलेल्या विविध शैक्षणिक व सामाजिक विषयांवरील अतिशय सुंदर व प्रबोधनात्मक आकर्षक चित्रांचे व हस्तकला प्रदर्शन यावेळी भरवण्यात आले होते. या प्रदर्शनाचे उद्घाटन प्रमुख पाहुणे आणि मान्यवरांच्या हस्ते करण्यात आले.

हे प्रदर्शन पाहण्यासाठी पालकांचा उस्फूर्त प्रतिसाद मिळाला व विशेष कौतुकही केले. यासाठी कलाशिक्षिका सौ. दिपा पडळे यांच्यासह विद्यार्थी आणि सर्व शिक्षक यांनी अथक परिश्रम घेतले.

प्रास्ताविक प्राचार्य अमित सस्ते यांनी केले, सूत्रसंचालन सौ.सुवर्णा निकम व सौ. सुषमा नाळे यांनी केले. आभार सौ. सीमा शिंदे यांनी मानले.