७० वर्षांची प्रतीक्षा संपली, सातारा ते पांगारे एसटी धावली

स्थैर्य, सातारा, दि. 15 नोव्हेंबर :  सातारा तालुक्यातील दुर्गम, डोंगराळ भागातील पांगारे गाव एसटी महामंडळाच्या बस सेवेपासून गेली ७० वर्ष वंचित होते. सातारा ते पांगारे बस सेवा सुरु करण्यासाठी राज्याचे सार्वजनिक बांधकाम मंत्री श्रीमंत छ. शिवेंद्रसिंहराजे भोसले यांचा पाठपुरावा यशस्वी झाला असून अखेर ७० वर्षांची प्रतीक्षा संपली आणि सातारा ते पांगारे एसटी धावली! यामुळे या मार्गावरील प्रवाशांची मोठी गैरसोय दूर झाली असून ग्रामस्थांनी ना. शिवेंद्रसिंहराजे यांचे आभार मानले.

गेली ७० वर्षांपासून पांगारे गावात कधीच एस टी बस आली नाही. पांगारे व परिसरातील इतर गावांना बससेवा मिळावी, सातारा ते पांगारे मार्गावरील डबेवाडी, अंबवडे खुर्द, भोंदवडे, पोगरवाडी, सोनवडी, गजवडी, बोरणे, सज्जनगड, ज्ञानश्री कॉलेज मार्गे पांगारे अशी बससेवा सुरु व्हावी यासाठी परळी भागाचे नेते राजू भोसले, कर्तव्य सखी मंचच्या अध्यक्षा सौ. अश्विनीताई शेळके व ग्रामस्थांनी ना. शिवेंद्रसिंहराजे, कर्तव्य सोशल ग्रुपच्या अध्यक्षा श्रीमंत छ. सौ. वेदांतिकाराजे भोसले यांच्याकडे पाठपुरावा केला. ग्रामस्थांच्या मागणीनुसार त्यांची गैरसोय दूर करण्यासाठी ना. शिवेंद्रसिंहराजे यांनी काही दिवसांपूर्वी एसटी महामंडळाच्या संबंधित वरिष्ठ अधिकाऱ्यांशी संपर्क साधून बससेवा सुरु करण्यामध्ये येणारे अडथळे दूर केले. ना. शिवेंद्रसिंहराजे यांच्या प्रयत्नाला यश मिळाले असून आज ही बससेवा सुरु झाली.

पांगारे येथे पहिल्यांदाच आलेल्या बसचे गावातील सरपंच, उपसरपंच, ग्रामपंचायत सदस्य, गावातील सर्व महिला, पुरुष यांनी उत्स्फूर्त स्वागत केले. यावेळी सौ. अश्विनीताई शेळके यांच्या हस्ते एसटीचे पूजन करण्यात आले. ही बस सातारा डेपोतून सकाळी ९.०० वाजता निघणार असून सकाळी सुमारे १०.०० वाजता ही गाडी पांगारे गावांमध्ये पोहोचणार आहे. तसेच दुपारी ३.०० वाजता सातारा डेपो मधून निघून सायंकाळी ४.०० वाजता बस पांगरे गावामध्ये पोचणार आहे. बससेवा सुरु झाल्याने ग्रामस्थांमध्ये सांध्यांचे वातावरण आहे.